Read Yupik Job 3 Bible Online

Job 3 - Yupik bible

Job 3

¹Cayaqlirluni taum kinguani Job-aq qanertuq aniqlaaluku erneq yuurtellni.

²Agayun, aniqlaagiu erneq yuurtelqa; aniqlaagiu-llu unuk tauna qingaurtelqa!

⁴Agayun, erneq tauna tan'gerurcessgu. Umyuaqenqigcaqunaku tauna erneq; tanqigmun ciqinqanqigcecaqunaku.

⁵Erneq alianarqellriaruvkarru tan'gercetqapigtellriaruluku; amirlunek patuu, akerta alaicetevkenaku.

⁶Perrirru tauna unuk tuaken allrakumek, naaqutngunqigcetevkenaku-llu allrakum erenrinun;

⁷irniangqerciigatevkarru, angnilriamek niitnarqelriartaicessgu.

⁸Qanruski angalkumirtaatulit erneq tauna aniqlaasqelluku, imkut qaillukuaritulit carayagmek Leviathan-aamek.[5]

⁹Unuakum agyartaa tanqigcecaqunaku; unuk tauna erqaarallerkaanek neryuniurutaicessgu.

¹⁰Unuk tauna aniqlaagiu wiinga yuurcetellranek, yuurcetellranek arenqiallugutmun angniitnamun-llu.

¹¹Tuqullrulii kitak aanama eneliarani wall'u tuqulua egmian yuurucimtun.

¹²Ciin aanama manumini tegumiaqelallruanga? Ciin-llu aamartelallruanga?

¹³Tuani tuqullrukuma, watua nangteqevkenii uitayartua,

¹⁴qavarlua ilalirluki angayuqat ayuqucirturtet-llu ataam naucilallret ak'allarnek angayuqat enellritnek.

¹⁵Qavaryarlua ilalirluki atanerruat suulutaarutellget, eneteng imilallrukait suulutaanek qerrirlinek-llu,

¹⁶wall'u qavarlua anqiiyaartun tuqumaluni yuurtellertun.

¹⁷Qungumeggni yuut assiitellriit assiilnguliunrilartut, taqsuqelriit-llu calistet mernuinerciryaqlilartut.

¹⁸Itengqalriarung'e'rmeng uitanqegcilartut, qanpagatesciurpek'nateng ellimertucurlaumaksaunateng-llu.

¹⁹Yuut tamarmeng tuantut, niitnaulallret kinkuuciilnguut-llu, teguat-llu angicimayaqlirluteng.

²⁰Ciin yuut unguvavkaumalartat nangteqnaq aturluku? Ciin tanqigmek cikiumalartat umyuiqelriit?

²¹Tuquyugyaaqluteng mayiteq'lartut, tau͡gaam tuquyugpek'nateng; qungumetlerkarteng arcaqakenruluku tukuutni.

²²Camek angniutaitelartut tuquluteng tau͡gaam elausngaqameng;

²³Agayutem ciunerkaat iirumalaraa casguliumaluku-llu tamiin avatiit.

²⁴Nerevkenii qiaguralartua, yuuniaranrirciiganii tuaten.

²⁵Cat tamarmeng alikek'nganka uluryakek'nganka-llu maa-i piciurtut.

²⁶Uitanqegcitaitua, mernuinerciutauni-llu, arenqiallugutenka-llu iquklicuunateng.