Read Yupik Job 30 Bible Online

Job 30 - Yupik bible

Job 30

¹Maa-i tau͡gaam angutet ayagyuanema anglanitek'laraatnga! Atait cautngunritsiyaagluteng yuugut taumek ikayurcecanritanka qimugtenka qusnginek qaunqillratni.

²Piqunqeggianateng, piniatessiyaagluteng ellimerrutemnek calisciiganateng.

³Arrsaukacagaameng kaigluteng-llu, taumek pukulaqait kinreskai naunraat acilqurrit unugmi alingnarqellriani yuilngurmi.

⁴Nunami mertailngurmi naumalriit qecuktalarait nerluki-llu, napat tuaten acilqurrit cacugniilnguut ner'aqluki!

⁵Yuut ayagcet'larait qatpagalluki, teglengalriatun pitarrluki.

⁶Allanek uitaviilameng qerranquni uitalartut, ilutulriani nayuumalriani teggalqut pen̄at qacarneritni.

⁷Yuilqumi neplialartut ungungssitun, quyuqucugaraqluteng napat aciatni.

⁸Catngunrilnguut kinkuuciinateng-llu! Ayagcetellrit nunamek.

⁹Maa-i-llu watua tailuteng temciarautek'laraatnga; picingssautngulua tau͡gaam ellaitni.

¹⁰Cumaciklua, yaaqsissaagarturluteng pilaraatnga, umyuarteq'lartut wangni assinruyukluteng, tailuteng tuaten kegginamkun qeciraaqlua.

¹¹Agayutem-wa piniarutevkaanga casciigalivkarlua-llu, ingluk'laraatnga cakneq qenerrluteng.

¹²Ukut tuqutarayulit curukaraatnga ciuneqlua; aqvaquavkarlua; pillerkiurtut nangnermek nangcillerkameggnek.

¹³Qimagvigkairlua piunringnaqaatnga, yugmek-llu arulaircestekaunateng.

¹⁴Ukinrikun cacetuqutma anuraluteng tailuteng-llu igqaqluteng nanerlua.

¹⁵Alingem tutaanga; takarnarqutka catairutuq anuqvallakalriatun, piluaqalqa-llu amirlutun catairulluni.

¹⁶Waniwa tuqullerkaqa canimelliuq, nangteqelqa qaillun utumarcesciigatuq.

¹⁷Unugmi tamarmeng enrenka cugialartut; engellugtulria neresteka arulaiqayuituq.

¹⁸Agayutem qecugmigaanga aturama pugyaraakun qipluki-llu aturanka eluciirluki.

¹⁹Milqaullua-llu marayamun, cangallrunritua urr'ami qamllermi-llu.

²⁰Agayun, qayagaularamken, tau͡gaam elpet kiuyuituten; piicagaqama-llu, ilangciyuituten.

²¹Eq'uyagutarpenga; pinirtacirpetun nangtarpenga.

²²Anuqmun tengcetarpenga; egqaqerpenga tuknilriami ellarayagmi.

²³Wiinga nallunritaqa ayautarpenga tuqullerkamnun, yuut tamarmeng ciunerkaatnun.

²⁴Ciin callugciu navguumalria angun, qaillun pisciigalnguq kiingan tau͡gaam takumcucaralria?

²⁵Qiaksaitellruunga-qaa yuut arenqiallugtellriit ilagarluki angniilutkaqluki-llu nuuqitellriit?

²⁶Angnimek tanqigmek-llu neryuniullruyaaqua, arenqiallugun tau͡gaam tan'geq-llu taillruuk.

²⁷Umyuassuugaam engellugtulriim-llu nangtaagnga; nangteqngama arulaiyuunii unuaquaqan.

²⁸Nunanialngurkun pektelartua, akertem ciqinqallranek pitailngurkun; Nangertelartua yugyalriami qayagauralua-llu ikayuusqellua.

²⁹Erinaka angniituq alianiurluni-llu kaviarngalnguut jackal-aat yaqulegpiit-llu ostrich-aat nepiicetun ayuqluni.

³⁰Amiqa tunguriuq petgerrluni tuaten; qaika puqelvagluni.

³¹Nunaniqluteng aturcetaalrianek niiskengangqelallruyaaqua, tau͡gaam maa-i tuquilriatun qialrianek niiskengangqertua.