Read Yupik Job 31 Bible Online

Job 31 - Yupik bible

Job 31

¹Wiinga wangnek akqellruunga neviarcar tangerrluku aglumaarkauvkenaku.

²Tua-llu qaillun Artuqailnguum Agayutem wiinga piciqanga? Qaillun akilartaki yuum caliari?

³Picurliim-qaa tut'eksaitai elluanrilnguut, piunririlriim-llu assiilngurmek calilriit?

⁴Agayutem nallunritai callrenka tamalkuita; tangvagluku-llu amllilqa tamiin.

⁵Iqlutmurucingnaqellrianun maligutellrukuma, allat-llu iqluungnaqellrukumki;

⁶Agayutem cuqlia piciulriatgun cuqcissuutetgun, elliin-llu tangerciqaa camek pinarqutailuciqa.

⁷Piciulriamek tumyaramek avtellrukuma, iigma-llu alarcetellrukagnga, unatenka-llu assiilnguum meciumakaki,

⁸neqkat nauceciillrenka piunriumalit, wall'u allanun nerevkarluki neqet naucillrenka.

⁹Aglumallrukuma nunalgutma nulirranek, utaqalgirlua-llu, iirumalua, amiigan elatiini,

¹⁰nuliama kitak keniuskiliu alla angun inarrluni-llu allam angutem ingelrini.

¹¹Tuaten ayuqellria assiilnguq anucimirqecetaarumanarquq tuqumek.

¹²Ayuqsartuq navguilriatun nangteqnam kenratun, piunrirluki cat tamalkuita piutenka.

¹³Pistem̄a iliita arnam wall'u angutem pitii ciuniullrunrilkumku qanellrani arenqiayugluni wangnek;

¹⁴qaillun-mi tua-i piyarcia Agayun nangreskan? Apqauqan, camek kiuyarcia?

¹⁵Agayutem-qaa eneliagni piliaqestellma pisteka-llu piliaqellrunritaa?

¹⁶Qunukutellrukumku camek arrsaulria piyuutiinek, aipaineq-llu ciunerkairucetellrukumku,

¹⁷wall'u neqenka kiima nerellrukumki elliraq-llu nerevkarpek'naku

¹⁸ayagyuarraanranek-wa anglicallrukeka nakmiin atiitun, anami-llu neliagkenek anrraanranek ciuliqagtaqa,

¹⁹tangellrukuma yugmek qerrulriamek aturailami, arrsaulria-llu angun uligkaunaku;

²⁰cikiryarqa aturarkainek qusngit melqurritnek taqumalrianek, wiinga nakmiin qusngiutemnek. Nutaan-llu elliin tamalkirrluku ircaquni nanraryaraanga.

²¹Elliraq yagtellrukumku, nalluvkenaku anagyauciqa qanercetaarvigmi,

²²talligka ayemqumakilik; qecuumakilik tusgegemnek.

²³Alikngamku Agayutem anucimirqecetaarutii, tuaten watqapik pingaitua.

²⁴Tukuuyaraq wiinga cacetuqutekeksaitaqa

²⁵tukuutemnek-llu ucuryagutekiksaunii.

²⁶Wiinga agayuksailngua akertem̄un ciqinqeraqan, wall'u iralumun tangssunarqellrani.

²⁷Alarcecimaksaitua qigcikutmek pisqellukek cingallemkun unatenka qigcigyulqa taukugnek maniluku;

²⁸Tuaten ayuqellria assiilnguq anucimirqecetaarnarqaa tuqukun; piciuyanrilama pakmanelngurmun Agayutmun.

²⁹Quyayuitua inglukestenka nangteqaqata, ilukegciteksuunaki-llu picurlagaqata;

³⁰Assiilngiqsaitua piicautellemkun tuqusqelluki.

³¹Calistem̄a tamarmeng nallunritaat allanret ciuniurrlainalauciit wangnun.

³²Kelelaranka egilraulriit enemnun tumyarani-llu qavarcecuunaki.

³³Allat iingnaq'larait assiilnguteng, wiinga tau͡gaam iirumaksaitanka assiilnguunka.

³⁴Alingeksaitua qaillun yuut qanllerkaitnek; nepaunii uitaksaitua wall'u enemek anyuunii alinglua yugnun caunrilleknayuklua.

³⁵Kia-qaa niicugningaitai qanellrenka? Ukvernarcariunga qanellrenka tamalkuita piciuniluki. Artuqailnguum Agayutem kiulia. Picetaarutestem̄a picetaarutkellri igausngakata tangerrsugngaluki wiinga,

³⁶umyuaqa quyigluku aturyaranka tusemnun elliluki qamiqumnun-llu elliluki nasqerrucetun.

³⁷Agayun caurallemnek tamalkuan qanruca'arqa, ciugngaluku-llu qamiquqa elliin ciuqerrani.

³⁸Nuna nauceciikengaqa teglegaqekumku, teguluku nakmiin pikestainek—

³⁹nerlaquma-llu naugillrinek akilirpek'naki, paluavkarluki naucetaaqestait tamakut,

⁴⁰naucetaarvik naugikili cukilananek, mukaarkanek pivkenani, wall'u naunerrlugnek, neqkanek pivkenani. Job-am qalartellra iquklituq.