Read Yupik Job 32 Bible Online

Job 32 - Yupik bible

Job 32

¹Job-aq ellminek elluaryukluni pian, taukut yuut pingayun taqaat kiungnaqsaaqerraarluku.

²Tau͡gaam niicugniuralriit iliita aterluni Elihu-mek qenertellni nuqingasciigalia, Job-aq ellminek elluakengan Agayun avalitekluku. (Elihu Barachel-aam qetunraqaa, Buz-am kinguveqluku, tungayallgutkelriarin Ram-am ilakluku.)

³Qenrulluki tuaten Job-am taukut pingayun yugnikestai. Qaillun kiusciigalatgu Job-aq, tamatum-llu Agayun alangqalriatun pinaluku.

⁴Tau͡gaam Elihu taukuni ayagyuanruami qigcigyugluni utaqalgillruuq taukut qanenermek taqlerkaatnek.

⁵Tangrramiu taukut pingayun kiutekaitelliniata Job-amun qenqertuq

⁶qalarrluni-llu. Wiinga ayagyuartua, elpeci-llu ak'allaurrluci, taumek ancurturyaaqelrianga alinglua-llu wiinga umyuarteqlemnek qanrutlerkarpecen̄ek.

⁷Wangnek qanrutua elpeci qalartarkauguci, elpecen̄un ciulirnerulrianun umyuartucirci qanrutkesqelluku.

⁸Tau͡gaam Artuqailnguum Agayutem anerneqaa wangkutnun tailalriim cikirluta-llu umyuartunermek.

⁹Ak'allaurtellrem umyuarturivkayuitaakut wall'u ikayuyuunata nallunritesqelluku elluaq.

¹⁰Taumek watua elpecen̄un niicugnisqua; qanrutqernaamci qaillun umyuarteqlemnek.

¹¹Niicugniurallruunga qalartellerpecen̄i utaqalgirlua-llu umyuangcallerpecen̄i ellalegtarnek qanllerkarpecen̄ek.

¹²Murilkurallruunga niilluki-llu ikayuutngunritellrat qanelci, nasvaksaitaci alangqaciit Job-am qanellrin.

¹³Qaillun qaneryarceci umyuartuneq nalaqellruniluku? Agayutem kiunarqaa Job-aq, elpeci-wa pisciigalavciu.

¹⁴Job-aq qalartellruuq elpecen̄un, wangnun pivkenani, wiinga tau͡gaam kiuyanritua elpeci kiullerpecetun.

¹⁵Job-aaq, camek qanerkaitut: qaillun kiutekaitut elpenun.

¹⁶Utaqaurlii-qaa qaneqsaunateng uitallratni? Yaani nangerngaut camek allamek qanerkaunateng.

¹⁷Qang'a, wiinga kiuteka wanirpak qanrutkeqatarqa qanrulluten-llu wiinga qaillun umyuartequcimnek.

¹⁸Qanerkanka amllerrata nuqingasciigatanka.

¹⁹Qanllerkamnek pillerkiumanrilkuma, qagerciiqua wine-am assigtaatun imaqaalriatun nutaramek wine-amek.

²⁰Uitasciigatua; qanernarqaanga.

²¹Kina ingluarvikluku pingaitua; yugmun-llu assikesqellua pingaunii.

²²Qaillun assikesqellua pillerkaqa nalluamku; tuaten pikuma Piliaqestellma ak'anun pivkenani piunriryaraanga.