Read Yupik Job 33 Bible Online

Job 33 - Yupik bible

Job 33

¹Kitaki nutaan, Job-aaq, niicugniurqiki qanerkanka elpenun.

²Upingariunga qanernalua umyuamni uitalriamek.

³Tamarmeng qanellrenka piciulriaruut, qalartua piciulriamek.

⁴Anerneran Agayutem piliaqellruanga unguvamek-llu cikirlua.

⁵Kiuyugngakuvnga kiukia; Qanerkarpenek upeskina.

⁶Agayutem tangvallrani wiinga elpet-llu ayuqukuk, tamamegnuk piliaqumallruukuk qikumek.

⁷Taumek camek alingutkaituten wangnun, cakviurcessngaitamken.

⁸Tua-llu, niitellruamken waten qanllerpeni:

⁹“Wiinga pinarqutaitua; camek alarteksaitua. Pinarqutaitua assiilngurmek-llu piinii.

¹⁰Agayun tau͡gaam nalaqut'lartuq avalitkaminek callugnalua inglukestem̄itun pitarrlua pilaraanga.

¹¹It'gamkun kalivnercilaraanga, cauralqa-llu tamalkuan murilkelluku.”

¹²Tau͡gaam qanrutamken, Job-aaq, elpet alartuten. Agayun angenruuq yugni.

¹³Ciin Agayun picilirciu kiuyuitniluki qiperrluuteten?

¹⁴Agayun qanengraan pulengtaarluni, kia murilkessuitai qanellri.

¹⁵Yuut qavaraqata mamtulriamek inglemeggni qavaryugluteng, Agayun qalartelartuq qavangutgun tangrruatgun-llu.

¹⁶Niicugnivkalarai elliin qanellminek, aarcirtuutainek-llu alingelartut.

¹⁷Agayun qalartelartuq assiilngillrat taqesqelluku anirturnaluki-llu ellaitnek pivakengllerkaitnek.

¹⁸Elliin piunriumavkarngaitai; aviutelarai tuqumek.

¹⁹Yuk ellangcaumalartuq naulluuluku taklartelluku ingelrinun, taqeksaunaku engellugturtelluku temiikun.

²⁰Kiituani-llu neryuumiirut'lartuq, picalquk'lallni-llu miryalnguksagulluki.

²¹Temii kemgiutaqluni nangluni; enri-llu tamarmeng tangerrnariluteng;

²²tuqumalriit nuniitnun ayagarkaurrluni.

²³An'gilam ullagluku ikayuryarturciqlia, Agayutem an'gilain tiissitsaarugaat (1,000s) iliita, qanrucartuusqelluku ca assilriarucianek elliinun;

²⁴An'gilam takumcukluku qanerciquq, “Pegesgu! Aviusgu ayallerkaanek tuqumalriit nuniitnun nalaqutua akikaanek petuillerkaan.”

²⁵Temii ayagyualriarurciiquq ataam-llu piniriluni;

²⁶piicakan Agayutem niiciiqaa, agayularciquq Agayutmun nunaniryugluni; Agayutem cat elluarciiqai elliinun.

²⁷Atuaguq yuut ciuqerratni, qanerluni-llu: “Assiilngillruunga, pellernariluku-llu ellualria, tau͡gaam Agayutem unguvavkaraanga.

²⁸Aviutellrua yuuciqa tuqumalriit nuniitnun ayagyallranek, waniwa-llu cali unguvalua.”

²⁹Agayun waten pilartuq pulengtaarluni;

³⁰tuquvkarpek'naku, nunaniryugluku yuusqelluku.

³¹Kitaki, Job-aaq, niicugniki qanellrenka; nepaunak qalarcetqernga.

³²Tau͡gaam camek qanerkangqerquvet, qanrutkekiu; quyalua pinarqutailucin qanrutkeciqaqa.

³³Qanerkailkuvet, nepaunak niicugniurqia, elicetniamken umyuartunermek.