Read Yupik Job 34 Bible Online

Job 34 - Yupik bible

Job 34

¹Elihu qanertuq:

²Elpeci umyuartuqapigtuci, elisngaqapiggluci-llu; waniwa niicugniciki qanellrenka.

³Ciutem niitellni pitassialarai, qilagam neqkat neqnirtassialauciatun.

⁴Cucukliqernaurtukut ca assiucianek; qanellgutekluta nallunaiqernaurput cam assiucia.

⁵Job-aq qanertuq camek pinarqutaitniluni, Agayutmun elluarrluni cuqtellrunritniluni.

⁶Aptuq, “Qaillun iqluyarcia qanerlua-llu alangqanilua? Kilineqa qaillun assiringaituq, tau͡gaam wiinga assiilnguitua.”

⁷Yugtangqertuq-qaa Job-atun ayuqellriamek, caunrilkuurilartuq mermek melriatun?

⁸Assikelaraa uitallgutkellrat assiitellriit yuut ilagaraqluki-llu assiilngiumalriit.

⁹Qanraqluni assilriamek iquitelarniluku maligtaqungnaqellra Agayutem pisqutiin.

¹⁰Taumek, niicugnicia, elpeci angutni taringumalriani! Artuqailnguq-qaa Agayun piciunrilngurmek caliciquq?

¹¹Elliin yuut akililarai caliaritgun pisqumataciicetun-llu piaqluki.

¹²Piciuguq Agayutem assiilngurmek caliyuilucia, cuqciaqami-llu assirluki piuratuluki.

¹³Kia piyunarqucilillruagu atanrusqelluku nunamun? Kia-llu ellarpagmek atanirturisqelluku pillruagu?

¹⁴Agayutem tegukaku anerneni unguvanarqellria,

¹⁵unguvalriit tamarmeng tuquyartut, yuk-llu urr'amun uterrluteng.

¹⁶Taringyugngakuvet, niicugniki qanellrenka.

¹⁷Caunrilkan-qaa ellualria Agayun? Umyuartequten-qaa eq'uksukluku elluarrluni cuqciyaraq?

¹⁸Agayutem pinarqelriarunilarai angayuqat atanirturtet-llu catngunritaqata wall'u assiilngurtuaqata.

¹⁹Atanirturilriit ingluarviksuitai, tukuulriit-llu arrsaulriani pinruluki piksaunaki, elliin-wa tamalkuita piliaqellruamiki.

²⁰Alqunaq tuquciqliukut unugmi, Agayutem agtularaakut wangkuta-llu catairulluta;

²¹Tangvauralaamiu yuum ayuqucia, tangvagaqluku-llu ayagallra tamalkuan.

²²Tan'gercetqapiaralriamek pitaituq assiilngiumalriim iirvigkaanek Agayutmek.

²³Yuk pillerkiumanritaa ciuqaminun tailluku cuqcimallerkaanek.

²⁴Yuvriarraaryunarqenritai ciuliqagcilriit au͡g'allerkaat allanek-llu cimirluki.

²⁵Caliarit nallunrilamiki; atrartelarai caunrirluki-llu unugpaagaq.

²⁶Anucimirqecetaalarai assiilngurtulriit yugnun tangvagtelluki,

²⁷tua-i-wa avcata maligtellermeggnek ellii, ilangcinrirluki-llu tamalkuita elliin alerquutai.

²⁸Arrsaulriit-llu elluarrluki pinrilaceteng qayagaulartut Agayutmun, elliin-llu niitelarai qayagaurallrat ikayuusqelluteng.

²⁹Agayun caksaunani uitayukan, kia cangaksanritaa. Agayutem uluqateng yuut qaillun pisciigacartut.

³⁰Qaillun pisciigacartut atanruviit agayutailngurnun nangcitulinun atanirtuusqumanrilngermeng.

³¹Job-aaq, apervikuatekellruaten-qaa assiilnguten Agayutmun akqiluten-llu assiilnginqiggngaunak?

³²Kaigavikellruan-qaa Agayun nasvitesqelluten nalluvni assiilngillerpenek, umyuallguciutellruuten-llu-qaa assiilnguum atullra taqnaluku?

³³Tua-llu elpet ciuniuryuumilavki Agayutem pillri, neryuniuruteksugngaan-qaa ellii camek pisqelluku elpet piyullerpenek? Cucukillerkan elpenun tusngauq, wangnun tusnganrituq; wanirpak qanruskut qaillun umyuarteqlerpenek.

³⁴Yuut taringumalriit qanruciiqaatnga, umyuartulriit-llu niitestenka qanerciqut;

³⁵Job-aq nallumang'e'rmi qalartuq qanellri-llu taringnaunateng.

³⁶Umyuangcauciki tamalkuita Job-aam qanellri: tangerciqerci qalarucia assiitellriatun yugtun.

³⁷Assiilnguni ilaluki inglulituq; tamamta ciuqamten̄i picingssautek'laraa Agayun.