Read Yupik Job 36 Bible Online

Job 36 - Yupik bible

Job 36

¹Elihu cali qanertuq:

²Nerinisngialliqutevkenii piqaa, nasvitniamken, cali qanerkangqerrama Agayutem qanrutkesqumallranek.

³Elisngaaqa amllertuq; nallunrilkengaqa aturluku nasvagciqaqa Agayutem, Piliaqestem̄a, piciurrlainalaucianek.

⁴Qanellrenka piciulriaruut, ciuqerpeni tangertuten ilumun umyuartulriamek angutmek.

⁵Piniqapigpagta Agayun! Caunrilkiyuunani kitumek; camek pitaituq elliin taringumanrilkiinek.

⁶Assiitellriit yuut unguvaurcecuitai, arrsaulriit-llu elluarrluki piuralarai.

⁷Camun pivkayuitai ellualriit; atanirturivkalarai angayuqacetun takarnarqellriaruvkalarai akwarpak.

⁸Tau͡gaam yuut kalivnernek qillerqumaaqata,

⁹Agayutem nasvit'larai assiilnguitnek ellmeggnek-llu pivakellratnek.

¹⁰Niicugnivkarluki aarcirtuutminek tuigtesqelluki assiilngurmek.

¹¹Niisngakunegteggu Agayun kevgiurluku-llu unguvaciqut uitanqegciluteng camek nuuqitevkenateng.

¹²Tau͡gken niisnganrilkuneng, anguyagkun piunrirarkauluteng, tuquluteng-llu taringumavkenateng.

¹³Yuut agayutailnguut qenerquralartut, anucimirqecetaarumangermeng-llu piicayuunateng ikayuusqelluteng.

¹⁴Ayagyuarinanermeggni tuqulartut, unguviit iquklilluni kasngunarqelriakun.

¹⁵Tau͡gaam Agayutem yuut nangteqevkarluki ayuqucirtularai, arenqiallugutekun-llu iingit ikirtaqluki.

¹⁶Agayutem picurlaumallerpenek aviutellruaten, alingniuqsaunak-llu uitavkarluten; estuulun pengiluni neqnek.

¹⁷Tau͡gaam watua anucimirqecetaarumauten pinarqucirpetun.

¹⁸Murilkekiu iqluurcetlerkan aassaqluteng akiliutnun, wall'u tukuutnun iqlutmurcecaqunak.

¹⁹Elpenun catngungaituq qayagaurange'rpet ikayuusqelluten; tamarmi pinirpet waniwa ikayurciigataaten.

²⁰Unullerkaa neriniksaqunaku, atanruviit piunriumallerkaat.

²¹Murilkekina assiilngurmun avcaqunak, nangteqevkaumauten tuaten pisqevkenak.

²²Neq'akiu angqapiaraucia Agayutem pinia; elitnauristen̄i tamalkuitni piunruuq.

²³Yuum Agayun qanrutesciigataa camek pisqelluku wall'u picilirngaunaku assiitellriamek piniluku.

²⁴Nanraumarrlainalartuq caliaminek; elpet-llu nanrarnarqan.

²⁵Tamarmeng yuut tangellruat caliari; tau͡gaam wangkuta tangvagyugngaarput yaaqvanek.

²⁶Tamarmirrluku nallunritesciigataput elliin angelriarucia wall'u naaqsugngaluki allrakui.

²⁷Agayutnguuq tegutelalria mermek nunamek kutngurrluku-llu ellalluuluku.

²⁸Ellalluk igcet'laraa amirlunek ellarvagtelluku tamalkuitnun yugnun.

²⁹Kia nallunritenritaa qaillun amirlut calligtaalauciat wall'u qaillun kalliralaucia qilagkun, Agayutem uitaviani.

³⁰Qilagni pagaani kalluum kenra kenerpallaravkalaraa, tau͡gken imarpiim et'uqri tan'gercequraraqluteng.

³¹Waten waniwa nerevkalarai yuut neqkaitnek-llu amllernek cikiraqluki.

³²Tegularaa kalluum kenra unatmikun alerqurluku-llu kenerpallarcesqelluku piyullermikun.

³³Kalluum qanrutkelaraa ellarayiim agiirucia, kuluviit-llu nallunrit'laraat ellarayakataucia.