Read Yupik Job 37 Bible Online

Job 37 - Yupik bible

Job 37

¹Ellarayiim ircaquqa kakavevkalaraa.

²Niicugniciu, tamarpeci, erinii Agayutem, kalluum tem'irtellra anelria qanranek.

³Kalluk kenerpallagavkalaraa qilagkun, ellam iquanek ayagluku iquanun.

⁴Nutaan-llu qastulria erinii niitnaulartuq, ucurnarqelria kalluum nepii, kalluk kenerpallaraluni.

⁵Agayutem erinii kallugtun ayuqelartuq irranaqluni; ucurnarqellrianek calilartuq wangkuta taringesciigalkemten̄ek.

⁶Agayutem alerqularaa qaniisqelluku nunamun, ellarvaasqaqani-llu ellarvagaqluni.

⁷Caliarat yuut arulaircet'laraa; yugnun tamalkuitnun nallunritesqelluku elliin caliani.

⁸Yuilqum-llu ungungssii igtem̄eggnun it'lartut.

⁹Ellarayiim anuqerpai calaramek tailartut, nengla-llu taigaqluni negeqvamek.

¹⁰Agayutem anerneran mer'et cikuvkalarai, mamturiluki.

¹¹Mamtulriit amirlut imilarai yukutamek; amirlut peksagtelaraat kalluum kenra,

¹²ayagaqameng Agayutem pisqellrakun. Agayutem pisqutii tamalkuan atularaat,

¹³Agayutem ellallircet'laraa nuna merqelluku; iliini anucimirqecetaarutnguluku taivkarciqlia, wall'u nasvilluta kenekminek.

¹⁴Job, uitauraqerluten niicugniqaa; umyuangcautekluki irr'inarqelriit Agayutem caliari.

¹⁵Nallunritan-qaa qaillun Agayutem alerquilaucia kalluum-llu kenra kenerpallaravkaraqluku amirlunek?

¹⁶Nallunritan-qaa qaillun amirlut pugtalauciat qilagmi, Agayutem irr'inarqelriim munaucian caliara?

¹⁷Qang'a, kiingan kiiryualartuten anuqem ungalamek kiirpiurcetaqaku nuna.

¹⁸Agayun-qaa ikayuryugngaan sagtellrani qilak tegg'iluku cavigtun qevlercaumalriatun?

¹⁹Ayuqucirturkut camek qanllerkamten̄un Agayutmun; wangkuta umyuarput camek imaitut; camek qanerkaitukut.

²⁰Wiinga apelcirngaitua qalarucugluku Agayun; ciin ellii pillerkiryarcia piunriisqellua?

²¹Watua tanqik qilagmi qitngirnarquq, tanqigcetsiyaagluni wangkutnun tangvallerkaa; qilak-llu anuqem kaginqegcaarallruluku.

²²Suulutaatun ciqinqalria tangerrnauguq negeqvami, ucurnaan-llu Agayutem imiraakut irrayugtelluta.

²³Agayutem pinia angqapigtuq taumek wangkuta mallegciigalkeput; elliin elluarrluni pitalqeggluni-llu auluk'laraakut.

²⁴Taumek, yuut tamarmeng qigcikekiit, elliinun-llu ilangciyuilucii qanelriit umyuartuniluteng.