Read Yupik Job 38 Bible Online

Job 38 - Yupik bible

Job 38

¹Tua-llu ATANREM qanrutaa Job-aq ull'uyam iluanek.

²Kituulriaten nalirruksiu umyuartuciqa nallumallerpegun, ellmikun-llu qalartellerpeggun?

³Watua nangerten nangrenqeggluteng kiuluki-llu elpenun apyutenka.

⁴Nantellrusit piliaqellemni ellarpak? Amllermek nallunrilkengaangqerkuvet, qanrusnga tamatumek.

⁵Kia angtacirkiullruagu? Kia cuqtaallruagu? Nallunritaten-qaa tamalkuita makut kiutait?

⁶Camun tusngaat naparyat[21] tusngavii nunam? Kia ellillruagu kangiritii ellarpiim?

⁷Tauna erneq erqaarallrani agyat atullruut atullgutekluteng, qilagmi-llu unguvalriit qayagpallruut nunaniryugluteng.

⁸Kia ikirtuqat patullruaki imarpik arulairrluku qagrutellrani nunam eneliaranek?

⁹Wang'ullruuq imarpiim patustellra amirlunek caquluku-llu tan'germek.

¹⁰Imarpiim cenkaa nallunailkucillruaqa arulairtelluku-llu caniruciumalriit ikirtuqat amatiitni.

¹¹Qanrulluku-llu, “Tuaten pitaluten tailarciquten, kiturpek'naku! Wavet tuknilriit qairet piten arulailararkaugut.”

¹²Job, unguvaqallerpeni-qaa erneq alerqullruan erqaaraasqelluku?

¹³Erqaar-qaa alerqullruan tegusqelluku nuna assiitellriit-llu kanevtesqelluki iirumaviitnek?

¹⁴Erenrem tanqian alaiterpagcet'larai pengut kuignayuut-llu 'lumarram imegglugnericetun, alaiterpagluteng takarnarqucim nallunairutiitun ellimallertun qikumun.

¹⁵Erenrem tanqia tanqigcetsiyaalartuq yugnun assiitellrianun nuqingaaqluki-llu nangcillerkaatnek.

¹⁶Imarpiim-qaa et'uqrinun ayallruuten paqluki mernek ulvelriit? Piyuallruuten-qaa imarpiim terr'ani?

¹⁷Iliita-qaa nasvitqaqsaitaaten ikirtuqamek nayurtiinek tan'gercetellriim tuqumalriit nuniita?

¹⁸Ellarpiim-qaa qaillun angtacia taringumaan? Kiunga nallunrilkuvet.

¹⁹Tanqiim-qaa naken tailaucia nallunritan wall'u tan'geq naken kingunengqerrucia?

²⁰Apertuucugngaagken-qaa ca engelekluku ayallerkaagnek, ataam-llu utertellukek?

²¹Asgurakenritaqa piyugngacin, ak'allaurcavet tuantellruavet-llu ellarpak piliaqumallrani!

²²Paqteqaqsaitan-qaa qemagcivika, qanikcarmek kavtagnek-llu?

²³Upingauralaragka arenqiallugutem pillerkaanun, anguyagmun calluutellerkaatnun-llu.

²⁴Ayallruuten-qaa akertem pugyaraanun, wall'u tuavet calaramek anuqliryaraan nuniinun?

²⁵Kia nuna elagluku ellalluk tumkiulartau carrirrluku-llu kalliraluni ellarayiim tumkaa?

²⁶Kia ellallircet'lartau yugtailngurmun nunamun?

²⁷Kia merqelartau kinreskii mertailnguq nuna, can'get nausqelluki?

²⁸Ellalluk-qaa wall'u unuakum yukutaa atangqertuq?

²⁹Kina aanakau cikum kanrem-llu,

³⁰mer'et teggalquurcetaqluki cikuvkarluku-llu imarpiim qainga?

³¹Quyurrluki-qaa agyat Pleiades-aat qillercugngaaten, wall'u-qaa angicugngaaten qillrutai Orion-aam?

³²Agyat-qaa ciuliqagcugngaaten allrakum cimillra tamalkuan wall'u picirkiuryugngalukek Big Dipper-aaq, Little Dipper-aaq-llu?

³³Nallunritaten-qaa alerquutet ataniumastait qiliit, atuurcecugngaaten-llu-qaa tamakut alerquutet nunamun?

³⁴Amirlut-qaa qayagpagaluki ellimerturyugngaaten ellallugmun mecirtelluten?

³⁵Kalluum kenra alerqulaquvgu kenerpallarasqelluku, ullagluten-qaa qanerciquq, “Ellimerrutekarpenun upingaunga”?

³⁶Kia qanrut'lartau yaqulek ibis-aaq qaku Nile-aq ulerpakataucianek, wall'u kia qanrut'lartau kuulicaaq angucaluq ellalliqatarniluku?

³⁷Kia umyuartutacini aturluku naaqsugngaaki amirlut uvercugngaluki-llu kuvnaluku ellalluk,

³⁸ellalluk tegg'ilartii urr'am tuvelkuurrluku?

³⁹Yugtutulit-qaa neqkaitnek nalaqut'laraten, nerevkarluki-llu piyagai camirrluki

⁴⁰iirumaaqata igtemeggni, wall'u nayuraqata igtemeggni?

⁴¹Kia nerevkalartaki tulukaruut kaigluteng ayagaaqata, piyagait qiagaqata wangnun neqkicesqelluteng?