Read Yupik Job 39 Bible Online

Job 39 - Yupik bible

Job 39

¹Nallunritan-qaa ingrirmiutaat qusngirngalnguut yuurtelallrat? Tangvalaraten-qaa yuilqurmiutaat tuntut irniaqata?

²Nallunritan-qaa qavcini iraluni qingalauciat, nallunritan-llu-qaa cami irnillerkaat?

³Nallunritan-qaa cami inartelauciit piyagateng-llu anlluki ellarpagmun?

⁴Irniarit anglirilartut piniriluteng, ayalartut utertevkenateng-llu.

⁵Kia yuilqurmiutaat ciulviit camek nagutaicet'lartaki? Kia petuillruaki piyugtaciicetun-llu tarritelluki?

⁶Cikillruanka nunamek kinreskiinek uitavigkaatnek, uitavkarluki-llu taryurtalegmi nunami.

⁷Yaaqsikiitni neptulriit nunarpiit uitalartut, kia nuyurriusngaitai calisteknaluki.

⁸Ingrit nervikait, tamaani yuaralartut piciatun neqkameggnek cungagcelngurnek.

⁹Yuilqurmiutaq-qaa kuluvagngalnguq maligtaqulluni qimugtekevkaryartuq elpenun? ungungssiutvet-qaa eniitni uitayartuq unugpak?

¹⁰Uskurirluku-qaa ilavkugmek nunamek itumcivkaryugngaan, Wall'u manigcissuutmek qamurtelluku naucetaarvigpeni?

¹¹Cacetuqutekciqan-qaa pinilegpaucia pitekluku, neryuniurluten-llu caliaten cakviurnarqellriit elliinun caliaqesqelluki?

¹²Neryuniurutkan-qaa elliinun quyurtesqelluki nauceciigalten quyurrluki-llu mukaarkat caranglluirivigpenek?

¹³Ostrich-aam yaqiullra cukavagta! Tau͡gaam ostrich-aat iliit tengauryugnganrituq stork-atun.

¹⁴Ostrich-aam kayanguni unitelarai nunam qainganun, puqliisqelluki nunam puqliinun.

¹⁵Nallua yuum it'gaanun ciamcugngacii, wall'u ungungssimun tutmaucugngaciit.

¹⁶Piyagani murilkessuitai, pikenrilngurtun ayuqulluki, umyuarniuyuituq pingnatuutellni ellmikuunayukluki.

¹⁷Wanguuq umyuartuarkauluku pillrunricestellra, umyuartunermek-llu cikillruvkenaku.

¹⁸Tau͡gaam alingallagluni aqvaqu'urqami, temciarautek'laraa horse-aaq ekumastii-llu.

¹⁹Elpenguuq-qaa, Job, horse-aat piniqapiggluki pivkartellrat uyaqurrit-llu melqurpirluki?

²⁰Qecgaurcet'laraten-qaa petgertayulitun alingevkaraqluki-llu yuut qengagmiaraaqata?

²¹Pinirtacirteng nasvagluku kuignayugni elagalaraat nuna cetumqumegteggun, ayakaraqluteng-llu calluutellrianun pinirtacirteng tamalkuan aturluku.

²²Alingem camek kangingqerrucia nalluat, nuussirpiim-llu kingutmuarcessngaunaki.

²³Caskut tegumiarit horse-aat ekumastaita kallagtelartut qevlialuteng-llu akertem̄i.

²⁴Uuleggluteng tengrum ugaani, pangalegluteng ayalartut; cupu'uryaraq cup'aqan uitasciigat'lartut.

²⁵Cupu'uryaraq tamiin qalriallrani qengagmiaralartut; naryugngaat anguyak mallegpailegmegteggu, niitelarait-llu anguyagtet atanerruarit qayagpagalriit ciuliqagciluteng.

²⁶Qakurtam-qaa tengauneq elitellrua elpenek teng'aqami ungalam tungiinun?

²⁷Pisqaqavni-qaa tau͡gaam yaqulegpak unglulilartuq qulvani ingrini?

²⁸Unglulilartuq quyinritni teggalqut cingikellriit-llu teggalqut asvailkutaqelarai.

²⁹Tuaken kiarquralartuq pitarkaminek, yaaqsingraata tangerrsugngiimiki.

³⁰Mallunun yaqulegpiit quyurtelartut, piyagait-llu augitnek mer'aqluteng.