Read Yupik Job 4 Bible Online

Job 4 - Yupik bible

Job 4

¹Tua-llu Eliphaz-aaq Temanite-aq kiuguq:

²Job, qalareskuma-qaa uumiyugciquten? Nepaunii uitasciigaliunga.

³Ayuqucirtulallruaten amlleret yuut, piniriaqluki-llu pinialnguut.

⁴Kina yuk paallacalkaraqan, pinianani, taqsuqluni, qanllerpet eguaqularaa nangercesqelluku.

⁵Tau͡gaam watua elpet nangteqnarqellriim tutaaten, tatamngavet-llu qaillun picirkaunak.

⁶Qigcikngavgu Agayun, nangrunaunak-llu yuungavet, nalirrugtevkenak neryuniuruterluten-llu pinarqaaten.

⁷Umyuangcaa, nallunrilkengangqertuten-qaa ataucimek yugmek ellualriaruluni picurlallerkaminun tekitellermek?

⁸Tanglartua yugnek assiilngurmek nauvigkiurilrianek naucetaarkatun-llu naullerkaanun assiitellria elliluku; maa-i-llu quyurciluteng assiilngurmek.

⁹Anuqetun cayukalriatun, Agayutem eq'uqerrluni piunrilarai.

¹⁰Yuut assiitellriit uirranilartut yugtutulitun, tau͡gaam Agayutem nepailarai navgurluki-llu keggutait.

¹¹Pininge'rmi yugtutuli piunrilartuq neqkaminek pitarkaitaqami, piyagai-llu arnacalum yugtutulim cekavvluteng.

¹²Caqerlua nepailcaarluni qanrucarturtemnek niitua, qaskilan-llu wii niitenricarpiarluku.

¹³Qavangurtucurlalriatun tuani qavacurlallruunga.

¹⁴Alingem tuc'anga qiivellruunga pekcillagalua; temka tamarmi uuleggluni.

¹⁵Anuqsaaraam kegginaqa agturaa, alingellruunga-llu qaimni tuar-tang nuyanka napartellriit.

¹⁶Ciuqamni-llu camek nangerngalriamek tangertua; tangvagyaaqaqa, tau͡gaam cauciinaku. Tua-llu nepailngurmi erinamek niitua:

¹⁷“Tuquarkaulria-qaa yuk ellualriaruyugngauq ciuqerrani Agayutem? Yuk-qaa menuicugngauq piliaqestem̄i ciuqerrani?

¹⁸Pisten̄i-llu qilagmi Agayutem paqnanailkenritai; an'gilaqeng'e'rmiki-llu pinarqutaitnek nalaqut'lartuq.

¹⁹Qaillun-mi nutaan paqnaktaciqau yuk nunamek piliaqumalria, urr'armek taqumalria passicimayugngaluni moth-atun ciissitun.

²⁰Unuakumi unguvayaaqsartukut, atakurpailgan tau͡gken tuquluta kitumek nallunritestaunata.

²¹Cauteput tamarmeng tegumalartut; tuquluta-llu cali umyuartunermek piilnginanemten̄i.”