Read Yupik Job 41 Bible Online

Job 41 - Yupik bible

Job 41

¹Manarluku-qaa cangtaqsugngaan imarpiim carayii,[23] wall'u qillerqulluku alungutii ilavkugmek?

²Sugg'erakun-qaa uskuriryugngaan ilavkugmek, wall'u manaq kapulluku agluqugkenun.

³Aguaguciiqaaten-qaa ayagcecesqelluni? Kaigavikeciqaaten-qaa takumcukesqelluni?

⁴Akqut'liciquq-qaa pillgutekluten akqiluni-llu kevgiurciqniluten akwarpak?

⁵Qillerciiqan-qaa qunguturatun yaquliyagartun, catun ulapequtekarpetun arnanun pistevnun?

⁶Kuvyastet-qaa arenqiirtuutekciqaat qaillun akitutaluku tunllerkaa? Wall'u-qaa kupcaat itumciiqaat tuneniaqnaluku?

⁷Narulkaquyugngaan-qaa amllernek nanerpagnek? wall'u nuusaarpagteggun qamiqurra ukilluku?

⁸Ataucirqumek agtuquvgu watqapik ataam agtussaanqiggngaitan; nalluyagusngaitan callullra!

⁹Kina imna Leviathan-aam tangertii alingallalartuq nunamun-llu iquluni.

¹⁰Eqcetaarumaaqami, cakneq alingnarquq; kina-llu imna nangerngasciigatuq ciuqerrani.

¹¹Kia callugciqau akngirtevkenani-llu? Yugtaituq ellam iluani tuaten piyugngalriamek.

¹²Qanrutqernaamken Leviathan-aam irugkenek qanrutekluku-llu angqapigucia pinilriarucia-llu.

¹³Kia elaqliq aturaa allgurluku yuuvkaryugngaagu? Kia teggliq anguyagcuun aturaa kapsugngaagu?

¹⁴Kia waten aitarcecugngaagu, avatmun alingnarqelrianek keggutelek?

¹⁵Tunungqertuq caniqliqellrianek capkutanek, tumarngaluteng tegtaluteng-llu teggalqutun.

¹⁶Tumarngayaaqem ugaani anuqngung'e'rmi iterciiganaku.

¹⁷Tumarngiimeng pengegnairumaluteng cam tua-i avegciigatqapiarluki.

¹⁸Aqestaqami tanqigpallartelartuq, iik-llu akertetun piqaaralriatun ciqinqerlutek.

¹⁹Keneq anlartuq qanranek paulayagaat-llu carevluteng elatmun.

²⁰Qengagken'gun aruvak an'aqluni, aruvagtun carangllugnek ekualrianek egatem aciani.

²¹Aneryaallran keneq kumartelaraa; ekualria anqertaqluni qanranek.

²²Uyaqurra piniqapigcan nall'arcestai alingelartut cakneq.

²³Nani mamkilqumek pitaituq amia; tegqapigtuq pektaarciiganani cavigtun.

²⁴Teggalqutun ayuqellria ircaqrua alingyuituq, pektaarciiganani tegtaluni miiliissuutem teggalqurratun.

²⁵Nangertaqan, pininqurraunge'rmeng alingelartut; casciiganateng alingem ugaani.

²⁶Nuussirpagtaituq kiliryugngastiinek, panartaituq wall'u pitegcautmek wall'u narulkaqutmek akngircugngastiinek.

²⁷Cavik canegtun elliini pitauq, punerneq-llu arumalriatun muragtun pitaluni.

²⁸Pitegcaucetaituq qimagcecugngakiinek; teggalqut tutmalriit elliinun canegtun ayuqut.

²⁹Kaugtuutaq canegtun elliini pitaut; engelarautek'larai-llu angutet narulkaquaqatni.

³⁰Aqsiik qeltengqertuk ipellrianek qikum assigtam navenritun ayuqellrianek, tamakut marayaq navgularaat nunamek itumcissuutetun.[24]

³¹Imarpik akutelaraa mertun qallarvalriatun qallangelriatun uqutun egatmi ayuqliriluku.

³²Minegluni qevlialriamek kingunrani; imarpik-llu qat'riluku qapuurrluku.

³³Nunam qaingani elliitun ayuqelriamek pitaituq; ungungssiuguq alingmek piilnguq.

³⁴Ungungssiaraat tamalkuita caukenritai, angayuqaqaat tamarmeng yuilqum ungungssiin.