Read Yupik Job 5 Bible Online

Job 5 - Yupik bible

Job 5

¹Job-aaq, watua qayagaura. Kitumek-qaa niitestekangqertuten? An'gilat-qaa ilangqertut cauvigkarpenek?

²Eq'urrluten umyuassuugaquvet tuquvigpenun tamana usviicarauguq cauvkenani.

³Tanglartua usviilngurnek picurlagngailngalngurnek, tau͡gaam wii piqatarraarpek'nii aniqlaallruanka enait.

⁴Tamakut irniarit aarnailngurmek uitavigkameggnek nataqusngaitut; kitumek-llu ikayurtekaunateng qanercetaarvigmi.

⁵Usviilnguum naugillrinek yuut kailriit nerciqut— cukilanat-llu akuliitni naumangraata— meqsulriit-llu ayariciqait usviilnguum tukuutai.

⁶Nangteqnaq nauyuituq nunamek, picurlagnarqelria-llu nauyuunani nunami.

⁷Qang'a! Wangkutnek tau͡gaam picurlagmun tekiutelartukut, paulayagaat qulmun tenglauciicetun ekualriamek.

⁸Wii elpengukuma tuigcartua Agayutmun, elliinun-llu arenqialluguteka tunluku caliaqesqelluku.

⁹Ellii calilartuq angelrianek taringumasciigalkemten̄ek, irr'inarqelrialiari-llu naaqumasciiganateng.

¹⁰Ellallircet'laraa nunamun merqelluki-llu naucetaarviit.

¹¹Aa-ang, elliin nalularai ellmeggnek pivakenrilnguut angniilnguut-llu angnirivkaraqluki.

¹²Pisciigalliqevkalarai yuut usvituyarrluteng picirkiulriit, umyuartulriit-llu napcetaqluki ellaita usvituyarutaitnun, callrat tamarmi elluatuusciigataqluni;

¹⁴erenrani tan'geqisngalartut, cavtaaraqluteng erenrem qukallrani unugmi pilriacetun.

¹⁵Tau͡gaam Agayutem anirtularai arrsaulriit tuqumek; enuqitellriit-llu anirturaqluki nangcimallratnek.

¹⁶Arrsaulriit neryuniurutkit'larai, elluanrilnguut-llu qanrat patuluku.

¹⁷Angnirciquq yuk Agayutem ellangcaqii! Taumek anucimirqecetaarutii uumiksaqunaku Artuqailnguum.

¹⁸Agayun kiliqenglartuq, tau͡gaam kilineq nemlaraa; yaggluten akngirtelaraaten, unatmikun-llu assirivkalaraaten.

¹⁹Pulengtaarluni anirtularciqaaten aarnarqellriamek;

²⁰piitnaq tuskan unguvavkarciqaaten, anguyiim-llu nalliini capkuciumaciqaaten tuqumek.

²¹Agayutem qanerrluutekestevnek aviuciiqaaten; anirturciqaaten piunririlria tekiskan.

²²Temciarautekciqan piunririlria piitnaq-llu alikngaunaki-llu yuilqum ungungssii.

²³Naucetaarviit itumtaqavteng teggalqurtaitelarciqut; yuilqum-llu ungungssiin alingevkalarngaunak.

²⁴Uitanqegciluten pelatekarpeni uitaciquten; yuvriquvki qusngiuteten atauciungraan tamaringaituten.

²⁵Nallunritarkaugan-llu kinguverpet amllerarkauciit irniaten-llu amllertaciqut nunam can'gitun.

²⁶Mukaarkam naullran taqmigtelauciatun quyurciyaraq tekilluku, unguvamaciquten ak'allaurrvigpenun.

²⁷Job-aaq, man'a yuvriumarraarluku ak'anun nallunrillruarput. Piciuguq, taumek ciuniurru assilriakun pillerkan pitekluku.