Read Yupik Job 7 Bible Online

Job 7 - Yupik bible

Job 7

¹Yuum unguvii ayuquq, umyuani aturpek'naku, anguyagten̄un ilausngalriatun, tema aturluku cakviulalriatun,

²pistetun talinermek kepqellriatun; calistetun-llu akingutkaminek neryuniulriatun.

³Iralut tamalkuita camek unguvatkaitua; unullra tamalkuan ilutequmalartua.

⁴Inartaqama qavarnalua, sass'at cukaitqapiaralartut; mumigtaarumaaqlua unugpak nerinillua erqaarallerkaanek.

⁵Temka paralut patumaat; qelten̄ek patumaluni; imaq qurrluraqluni pupimnek.

⁶Erenret wangni pellulartut cukanruluteng massiinarkun mingqellriami,[6] iquklitaqluteng neryuniurutaunateng.

⁷Agayun, umyuaqiu wiinga unguvama anerneqainaucia; angnilqa ak'a pellullruluni.

⁸Tangertek'lallma tangerrngairuciiqaanga. Yuaquvnga nataqngaitarpenga.

⁹Amirlutun mitriarutellriatun catairulluni-llu, taumek yuk tuqulria utertenqigcuilnguq;

¹⁰eneminun utertenqiggngaituq, nallunritestellrin-llu nalluyaguciiqaat.

¹¹“Taumek wiinga qanerkaqa nuqingangailkeka; qenercama umyuaqa-llu cakneq assiinani. Qalartenricuumiitua.

¹²Wiinga-qaa imarpiungama, wall'u-qaa imarpiim carayaknganga[7] nayurcirarpenga?

¹³Inarrlua mernuinercingnaq'laryaaqua; engellugtulqa utumarikanirnayukluku.

¹⁴Tau͡gaam elpet alingevkararpenga qavangurtuavkarlua, tupagciigacetaqlua tangrruartellua alingnarqellrianek

¹⁵kiituani qemillua tuqucimallerkaqa cucuksagutaqa, tememni nangteqnarqellriami uitayuumiirullua.

¹⁶Tuatequagua; mernurtua unguvallemnek. Ilangcivkenii uitasnga, unguvang'e'rma catngunrilama.

¹⁷Caulria yuk carpagtun pitarrluku pilarciu? Ciin murilkelarciu caurallra?

¹⁸Yuvrilaran unuakut tamalkuita, naspaagurluku-llu kesianek.

¹⁹Qaillun taktalriamek uluqsaunii tangvakatarcia, tangvanritqaquvnga nuaka igyaqka?

²⁰Assiilngiquma, cayarciken, elpet yuut murilkurtiitni? Ciin iingaaquuteksia? Cakviurutngussiyaagtua-qaa elpenun?

²¹Assiilngumnek-qaa watqapik au͡g'aritesciigatarpenga? Alarqaqlemnek-qaa anucimirqecetaanricesciigatarpenga? Ak'anun pivkenii qungumnun piarkaurtua, elpet-llu yuange'rpenga nalaqngaitarpenga.”