Read Yupik Job 8 Bible Online

Job 8 - Yupik bible

Job 8

¹Tua-llu Bildad-aaq Shuhite-aq qanertuq:

²Qaillun taktalriamek makunek piciunrilngurnek qalarteqatarcit?

³Agayun-qaa piciatun cuqcituuq? Wall'u-qaa Artuqailnguum piciulria piciunrilnguurrluku pilaraa?

⁴Irniaten assiilngillrukata elliinun, anucimirqecetaarciqai pinarquciicetun.

⁵Tau͡gaam umyuarnayaguciluten kaigavikekuvni Artuqailnguq Agayun;

⁶iqluyuilkuvet canganarqutaunak-llu, Agayutem ullagluten ikayurciqaaten nunuliutekluku-llu elpenun ataam ilakuralriarurrluci.

⁷Tukuuteten tamarilten caungaitut pitassiaruskuvteng Agayutem cikiutekainun taum nalliini.

⁸Apqaurutkiki ciuqvallaat, umyuangcautekluki-llu ciuliat elitellrit assilriit.

⁹Unguvavut wangkuta nanituq, camek-llu nallunrilkengaunata watqapik, kitulartukut talinertun nunam qaingakun.

¹⁰Tau͡gaam ak'allarnun yugnun elitnaurceten; niicugniki qanellrit:

¹¹“Cuplulget nausciigatut mer'ilngurmi; tangrrumayuitut elatiini merrlilriim.

¹²Kinraqaku meq ciungatgun allat naumalriit nalalartut, nanitessiyaagluteng kepluki camun atullerkait.

¹³Agayutailnguq yuk makucetun cuplulegtun ayuquq; neryuniurutiit tamalartuq, nalluyagutaqaku Agayutem.

¹⁴Cacetuqutekilriatun ayuquq negairem kuvyaanek.

¹⁵Nayumiqaciqaa-qaa negairem kuvyaan yuk iggaggvikekani? Iqukuni-qaa teguleqani ikayurluku nangerceciiqaa?”

¹⁶Assiitellria yuk nauga'rtelartuq naunerrlugtun akertem̄i, naunerrlugtun cekavtellriatun naucetaarvigmi.

¹⁷Acilqu͡rri nemrut'lartut teggalqunun asvailkutaqluki tamalkuita teggalqut.

¹⁸Tau͡gaam qecuumakata naumallritnek yuum yuarnakngaitaa tuantellrucia.

¹⁹Tua-i tau͡gaam angniutii yuum assiitellriim, allat-llu tailuteng enailarait.

²⁰Tau͡gaam Agayutem watqapik cakaarngaitaa canganarqutailnguq yuk, watqapik-llu ikayurngaunaki assiitellriit yuut.

²¹Ataam engelaryaurceciiqaaten, qayagpagayugngarivkarluten-llu,

²²eq'ukesteten aturiumaciqut kiaresngiatnamek, assiitellriit-llu yuut enait catairuciiqut.