Read Yupik Job 9 Bible Online

Job 9 - Yupik bible

Job 9

¹Job-aq kiuguq,

²Wiinga nallunritaqa tuaten ayuqucia: Qaillun-mi yuk pitalqellriaruciqa Agayutem ciuqerrani?

³Yuum qaillun kaggagucugngaagu? Apcugngauq tiissitsaanek apyutnek kia watqapik kiungailkainek.

⁴Agayun umyuartuqapigtuq artuqaunani pinilriaruluni; kia ingluliryugnganritaa.

⁵Ingrit nugtartelarai, ellaita-llu nalluaqluku nugtarucirteng eq'uqertaqami-llu piunriraqluki.

⁶Agayutem nuna pekcet'laraa qiivvluku, nunam tusnganri arulavkarluki.

⁷Akerta pivkanrilkani pisngaituq; agyat-llu cali pivkanrilkateng tanqigngaunateng;

⁸elliin kiimi ikayurtaunani qiliit sagtellrui, kiimi-llu cali tutmallruluku tunuakun imarpiim carayii.[8]

⁹Agayutem agartellrui agyat— Dipper-aaq, Orion-aaq, Pleides-aaq, ungalalirnermelnguut-llu agyat.

¹⁰Caliari angengata wangkuta taringesciigat'laraput, irr'inarqelrialiari-llu naaquciitut.

¹¹Agayutem canimkun kitungraanga wiinga tangerciigataqa.

¹²Piyukminek tegutelartuq, kia-llu arulaircessngaunaku. Kia-llu waten apesngaunaku, “Calisit?”

¹³Agayutem eq'uqertellni pinricen̄arngaitaa, piunrillrui inglukesten̄i ikayurtai Rahab-am.[9]

¹⁴Qaillun-mi tua-i qanerkamnek nalaquciiqsia kiutekamnek Agayutmun?

¹⁵Pinarqutaileng'e'rma, kiingan kaigayugngaunga takumcukesqellua Agayutmun cuqcestemnun.

¹⁶Qayagauqumku elliin-llu kiukanga, ukveryanritua elliinun niicugnillrucia erinaka.

¹⁷Anuqerpagteggun callularaanga, qiurqevkarlua camek pitkaileng'e'rma.

¹⁸Taqsuqainercircessngaitaanga; unguvaka imillrua cungarninarqellriamek.

¹⁹Pitassiayunarqua-qaa Agayun qessangraan camek pivkangnaqluku? Qanercetaarvigmun-qaa ayaullaku? Kia-qaa ayagcecugngaa qanercetaarvigmun?

²⁰Pinarqutkaileng'e'rma, tau͡gken qanellma niitellrat pinarqutkangqerrnganateng pilartut, qanellma-llu tamarmeng pinarqutkangqerrngacet'laraatnga.

²¹Camek pinarqutkaitua, tau͡gaam wani cangalliunrirtua. Unguvayuumiirutua. Cat ping'e'rmeng wangni caunritut;

²²ayuquk; yuk pinarqutkailli wall'u pinarqutengqerrli Agayutem tamarkenka piunrirciqak.

²³Yuk pinarqutkailnguq alqunaq tuquaqan, Agayutem temcik'laraa.

²⁴Agayutem cikiutekellrua ellarpak assiitellrianun yugnun. Cikmircetellrui tamalkuita cuqcistet. Agayutem pivkallrunrilkaki, kia pivkallruaki?

²⁵Erenret wangni cukamek pellulartut, atauciq-llu iliit assilriaruvkenani.

²⁶Cukanqurrartun angyatun unguvaka kiturtuq, cukataluni yaqulegpagtun ellu'urtellriatun pitarkaminun.

²⁷Quuyuarquma nalluyagutengnaqluku-llu engellugtulqa, tamarmi nangteqelqa utertelartuq taqsuunani;

²⁸nallunritaqa ilumun tua-i Agayutem tangvagaanga pinarqelriarulua.

²⁹Pinarqelriarulua pimiima, ciin tua-i waniwa pingnatugyarcia?

³⁰Qanikcarmek eruquma wangnek, unatenka-llu miilirluki lye-amek erungramki,

³¹igceciiqerpenga pellernarqelriamun petmigmun, aturaqengramteng-llu kasnguksaguciiqaatnga.

³²Agayun yuukan, kiuyaraqa; cuqcivigmun ayaglunuk elluaringnaqsararpuk man'a qanemyuugautpuk.

³³Tau͡gaam yugtaituq akunlemegni arulaircestekamegnek cuqtestekaitukuk tamamegnuk Agayun wiinga-llu.

³⁴Kaugtuutani au͡g'arliu wangnek, uluryanarqellran-llu alingevkanrillia.

³⁵Nutaan qalarcartua elliinek alingevkenii, wangnek ayuquciqa nallunrilamku.