Read Yupik Psalm 102 Bible Online

Psalm 102 - Yupik bible

Psalm 102

¹Niisgu piicauteka, ATANEQ. Niisnga qayagaullemni ikayuusqellua!

²Uluryaqunii nanikuallma nalliini! Niicugninga, patagmek kiuniarpenga qayagauqumken!

³Unguvaka catairutqatartuq aruvagtun; temka ekualriatun kenertun ayuqluni.

⁴Kinreskiitun canegtun ayuqliriunga; kiituani neryuumiirutua.

⁵Yuuniaravakallma kemgiucetaanga, nerrlainaurrlua.

⁶Yaqulegtun nernerrluulriatun yuilqumi ayuqliriunga, iggiayulitun nunallerni uitalriacetun.

⁷Qavarciiganii; yaqulegtun ayuqlua kiimi misngalriatun enem kangrani.

⁸Ernerpak caunrilkuularaatnga inglukestem̄a; picingssautekestem̄a tuaten atqa apaaluku aniqlaagiaqluteng.

⁹Qenrucavnga eq'urrullua, qamlleret neqeksagutanka; mer'aqlua-llu aluvimnek avulegmek. Tegulua elpet egtarpenga.

¹¹Unguvaka ayuqliriuq atakuarmi talinertun; canegtun qakikiitun ayuqlirilua.

¹²Tau͡gaam elpet, ATANEQ, atanruuten nangyuilngurmek; kinguveqellriit tamarmeng atren umyuaqelarciqaat.

¹³Nangerrluten takumcukciqan Zion-aaq; naklekillerkan elliinek pinariuq; waniwa nakmikillerkan elliinek tekituq.

¹⁴Pistevvet kenkaat, piunriumangraan; takumcukaat, imerqumangraan.

¹⁵Angayuqauviit yuit qigcigyugciqut ATANERMEK; tamarmeng nunam atanri alingeciqut pinianek.

¹⁶ATANREM ataam Zion-aaq nauciiqaa, ucurnarqucini nasvagluku.

¹⁷Niiciiqai yun'i nanikualuteng piicakata, caunrillekngaunaki-llu kaigavikekatni.

¹⁸Man'a igauskilitgu nallunritniaraat kinguvemta yuin, yuut yuurteksailnguut nanrarniaraat Agayun.

¹⁹ATANEQ uyangtuq pakmaken tanqilriamek uitaviminek, nuna tangrraa qilagmek.

²⁰Niitai inglukestemta teguarit yuuniarallratni, angilluki-llu tuquarkauyaaqellratnek.

²¹Taumek ATANREM atra qanrutkumaciqellria Zion-aami, nanraumaluni-llu Jerusalem-aami,

²²atanruviit yuit angayuqauviit-llu yuit quyureskata agayunaluteng ATANERMUN.

²³ATANREM pinialivkaraanga ayagyuarinanemni, unguvallerkaqa nanilicarluku.

²⁴Agayun, ayaucaqunii watua ak'allaurpailegma. ATANEQ, elpet unguvalriaruuten akwarpak;

²⁵ak'a tamaani ellarpak piliaqellruan, nakmiin-llu unatevgun qiliit piliaqellruluki.

²⁶Tamakut piunrirciqut, tau͡gaam elpet piugurciquten; tamarmeng aturatun nangciqut. Elpet ciqiciiqaten aklullertun, catairulluteng-llu.

²⁷Tau͡gaam elpet cimiyuituten, unguvallren iquklisngaunani.

²⁸Irniaput wangkuta yuuciqut aarnailngurmi. Elpet-llu camun pivkarngailavteng pinritevkenateng kinguvengqerrarkauluteng.