Read Yupik Psalm 104 Bible Online

Psalm 104 - Yupik bible

Psalm 104

¹Yuucima nanrarliu ATANEQ! ATANEQ Agayutmaa, angtataituten! Ucurnarquciq takarnarqun-llu aturaqellriatun ayuqagken;

²caqumaluten elpenek tanqigmek. Sagtellruan qilak pelatekamek civcilriatun

³eneliluten-llu pakmani qiliim mer'et-llu quliitni[22] uitalriamek. Amirlut ekumavikelaraten ayagassuutekluki anuqmun-llu ayagatelluten.

⁴Anuqet qanerkiurluki ayagcet'laraten, kalluum-llu kenerpallagallri pitekluki.

⁵Nuna tusngavigkaanun ellillruan, pekcecimaarkaunrirluku.

⁶Imarpigmek-llu patuluku aturilriatun, mer'em-llu naligluki ingrit.

⁷Nunuavteng mer'et qimallruut; niicamegteggu qastuluni erinan cukamek ayallruut.

⁸Ingrit-llu alairluteng kuignayuut-llu iluturiluteng, mer'et nunakiurallerpenun elliavki.

⁹Ngelelirluki-llu pellugciigalkiitnek, nuna patunqigtarkaunrirtelluku.

¹⁰Nunam akuliinek ulvelrianek meng'evkaraten kuignayuut, qurrlurluteng qemit akuliitgun.

¹¹Yuilqumi ungungssit merkangqertelluki; tamaani ciulviit camirrluteng mer'aqluteng.

¹²Napani-llu mer'em canianelngurni yaqulget qalrialartut ungluliluteng-llu.

¹³Qilagmek pagaaken ellallircet'laran ingrinun, nuna-llu atawaqautevnek imiumaluni.

¹⁴Kuluviit neqkait can'get nauvkalaraten naucetaarkat-llu yuut aturarkait, neqkanglaasqelluki nunam naugillrinek,

¹⁵angniutekangesqelluki-llu wine-anek, olive-aat-llu uquatnek kenugutekluku mingugkaatnek, neqkanek-llu pinircautekaitnek.

¹⁶Napai Lebanon-aam ellallilgularai— naparpiit Lebanon-aami elliin ATANREM nauvkallri.

¹⁷Tamakuni yaqulget unglulilartut, qucillgarngalnguut-llu ungluliaqluteng kevraartuni.

¹⁸Qertulriit ingrit nunakelarait qusngirngalnguut, qiuret-llu uiret uitavikaqluki.

¹⁹Iraluq piliaqellruan nallunailkutauvkarluku allrakum iraluinun; akerta-llu tevituluni piyaramini.

²⁰Tan'geq piliaqellerpeni unulangellruuq, ungungssiaraat tarrangyaraqluku.

²¹Yugtutulit piyagaita tarracaraqluku uirraniaqluteng pitarkameggnek yuarluteng neqkameggnek cikiutmeggnek Agayutmek.

²²Akerta pit'aqan utertaqluteng igtem̄eggnun qungelrayarturluteng.

²³Yuut-llu calillerkameggnun ayagaluteng calinaluteng atakullranun.

²⁴Piliaqelten amllerpagtat, ATANEQ! Umyuartuluten-llu piliaqellruaten tamalkuita! Nuna imarluni piliaqellerpenek.

²⁵Yaa-i-llu imarpik piliaqellren, angluni iqtuluni-llu, uitavikluku naaquciilnguut unguvalriit, angelriit mikellriit-llu.

²⁶Sun'at ayagaaqluteng tamaaggun, Leviathan-aaq-llu tuanlluni, imna imarpiim carayii piliaqellren.

²⁷Tamarmeng makut neryuniulartut neqkameggnek elpenun cikiumallerkameggnek kaingaqameng.

²⁸Cikiraqavteng nerlartut; neqkaitnek paivcit'laavteng camirtelartut.

²⁹Murilkenritaqavteng nanikualartut; anernerat-llu teguavgu tuquluteng, uterrluteng ataam kingunermeggnun nunam caarrluanun.

³⁰Tau͡gaam anernerpenek cikiraqavteng piurtelartut; allat nutarat nunami piurcequralaavki.

³¹ATANREM ucurnarqucia piukili akwarpak! Nunaniryuutekekiliki ATANREM elliin piliaqellni!

³²Nuna tangrraqani uulegtelartuq; ingrit agturaqateng aruvagmek maq'aqluteng!

³³Unguvama taktaciatun atuutelarciqaqa ATANEQ; unguvaqallemni nanrautnek aturciqua Agayutemnun.

³⁴Umyuangcautemkun ilukegcivkaryugaqa ATANEQ, angniuteka elliinek kingunengqerran.

³⁵Ataki assiilngurmek atulriit piunriumakilit nunami; assiilngurnek yugtairulluku! Yuucima nanrarliu ATANEQ! Nanraumali ATANEQ!