Read Yupik Psalm 105 Bible Online

Psalm 105 - Yupik bible

Psalm 105

¹Quyavikiciu ATANEQ, angelriarucia-llu qanrutekluku; qalarutekluki-llu caliari nunat yuitnun!

²ATANEQ atuuciu nanrarluku, qanrutekluki-llu assilriit caliari!

³Ucuryagutekiciu tanqilria atra, nanrartai tamarmeng nunaniryukilit.

⁴Ullagciu ATANEQ ikayurtekarci; taqeksaunaci-llu nanrarluku.

⁵Elpeci kinguvrini Abraham-aam, Agayutem pistiin; elpeci-llu Jacob-aam kinguvrini, Agayutem cucukellran: umyuaqiciki irr'inarqellriit Agayutem caliaqelallri cuqcilallra-llu.

⁷ATANRUUQ wangkuta Agayutvut; alerquutai-llu piugut nunam yuinun tamalkuita.

⁸Akqutni elliin piuvkarciqaa nangyuilngurmek nalluyagusngaunaki-llu akqut'liallni elpecen̄un akwarpak.

⁹Akquyun Abraham-aamun taqellni piuvkarciqaa cali-llu Isaac-aamun akqutkellni.

¹⁰Tamana-llu akquyun picirkauluku egmirtellrua Jacob-aamun, akwarpak piugarkauluni Israel-aamun,

¹¹qanerluni, “Canaan-aam nunii elpenun cikiutekciqaqa, kinguverpenun pikarkaurtelluku.”

¹²Tamatum nalliini Agayutem yui yugyallrunritut, allanruluteng Canaan-aami.

¹³Upagaluteng nunalinqigtaarluteng, angayuqauvilegnun calligtaarluteng.

¹⁴Agayutem-llu kitumun nangcetellrunritai; nunat-llu atanrit aarcirturluki ellait pitekluki,

¹⁵qanerluni, “Akngircaqunaciki cucukluki pisteksagutellrenka, qaillukuaryaqunaciki prophet-aanka.”

¹⁶ATANREM-llu nuniit piitnarcetellrua, neqkautairutevkarluki.

¹⁷Tau͡gaam ayagcecillruuq angutmek Joseph-aamek ciungatgun, tunumallermek teguarusqelluku.

¹⁸It'gamikun-llu kalivnerciumallruuq, uyaqurrilitarluni-llu cavigmek,

¹⁹elliin qanrutkellra tekitarkaq piciurrnatkaanun. Agayutem-llu qaneryaraan tamana qanellra asguranaillruluku.

²⁰Tua-i-llu Egypt-aam atanran itercivigmek anevkaraa; nunam tamatum atanran anevkarluku.

²¹Atanirtuq'ngaminun ciuqliurcetaa, atanirturilriarurtelluku Egypt-aam nuniinun tamalkuan,

²²atanirturarkaurtelluki atanerruari Egypt-aam, piyunarquciliumaluni-llu picirkiulararkaurrluki ayuqucirtuastai atanrem.

²³Tua-llu Jacob-aaq tekituq Egypt-aamun nunaliluni-llu tamaani.

²⁴ATANREM-llu yun'i irnialingevkarai pininrurtelluki inglukestaitni.

²⁵Egypt-aarmiunun-llu yun'i eq'uyagucetai, picirkartuyarut'ngevkarluki pisten̄i ayuqenrilngurteggun.

²⁶Tua-llu ATANREM pisten̄i Moses-aaq ayagcetaa Egypt-aamun malilirluku Aaron-aamek, cucukellerminek.

²⁷Agayun irranarqelrianek elkegnegun calillruuq irr'inarqelrialiluni-llu Egypt-aami.

²⁸Nuniit tan'gerivkallrua, tau͡gaam Egypt-aarmiut inglulicameng maligtaqunritait pisqutai.

²⁹Mer'et-llu tamaani augurcetellrui neqet tamalkuita tuquvkarluki.

³⁰Nuniit cali peleqpel'e'rnun patuvkarluku, Egypt-aarmiut atanrata eniin ilukengraaku.

³¹Qanellrani-llu cali ciivagugaat melugyaraat-llu mikuqapiarluteng tekitellruut nuniitnun.

³²Kavtagnek-llu cali ellallirtelluku, kalluum-llu kenra kenerpallaravkarluku nuniitni tamalkuan,

³³piunrirtelluki tuaten wine-arkanek atsanek-llu fig-anek naugitulit napat, napat-llu tamalkuita iqurqelluki.

³⁴Qanran-llu cali petgertayulit tekitut amllerem ugaani naaqesciigalnguut.

³⁵Tamakut-llu nerait naumalriit tamalkuita nunami; naucetaarit-llu neqkait nerluki nangluki.

³⁶Tuquqluki-llu yung'eqarraarutait angutet Egypt-aami tamalkuan.

³⁷Nutaan-llu ayaulluki Israel-aam yui tamaaken; akiucirluteng qerrirlinek suulutaanek-llu, tamarmeng-llu tememegteggun pinirluteng.

³⁸Egypt-aarmiut-llu quyallruut ayallratni aliksagucamegteki.

³⁹Amirlumek-llu capkucillrui, tanqiutekaatnek-llu kenermek unugmi cikiraqluki.

⁴⁰Ellaita kaigavikngatni yaqulegnek egtuugnek cikillrui; neqkaitnek camirutkaitnek cikirluki qilagmek.

⁴¹Teggalquq ukitellrua meq-llu tuaken maqluni, kinernerkun nunakun qurrlurtelluku kuigtun.

⁴²Umyuaqaa-llu qigcignarqellria akqutkellni pistem̄inun Abraham-aamun.

⁴³Tua-i ayautellrui yun'i, taukut-llu angnirluteng qayagpagaut aturpagaluteng-llu.

⁴⁴Nunakaitnek-llu cikirluki allat pikellritnek naucetaarviit piksagutelluki,

⁴⁵yum'inun atuusqelluki pisqutni maligtaquluki-llu picirkiutni. Nanrarciu ATANEQ!