Read Yupik Psalm 106 Bible Online

Psalm 106 - Yupik bible

Psalm 106

¹Nanrarciu ATANEQ! Quyavikiciu ATANEQ, assilriaruan, kenkii-llu nangengaunani.

²Kia tamalkuita qanruteksugngaaki ucurnarqellriit caliari ATANREM? Kia-llu nanrautet elliinun tamalkuita aturyugngaaki?

³Atawaqertut niisngalriit alerquutainek, kesianek elluaryaraq aturluku.

⁴Nalluyagucaqunii, ATANEQ, yut'en aviuskuvki; ilakevkaqia anirtuquvki.

⁵Tangerrniarqa yugpet piluaqallrat angnillgucirluki-llu angnillratni, umyugaat quyigluni elpenun yuk'ucimeggnek angniutengqellriatun.

⁶Wangkuta ciuliamcetun assiilngillruukut caarrliqsarakun yurrluuyarakun-llu.

⁷Ciuliamta ayuqucingumallrunritait Agayutem irr'inarqelriit caliari Egypt-aami; nalluyagutellruat amllerqunek kenkutminek nasvagillra ellaitnun, ellaita-llu ingluliurluku Artuqailnguq imarpigmi Red Sea-mi.

⁸Tau͡gaam elliin anirtullrui akqellrucimitun, nallunritesqelluku ellaitnun artuqailucini.

⁹Imarpik Red Sea alerquani kinresqelluku kinellrua; elliin-llu yun'i ciuliqaggluki qerartelluki kinreskiikun nunakun.

¹⁰Anirtullrui eq'ukestaitnek; anaulluki inglukestaitnek.

¹¹Inglukestait-llu mer'em patullrui; qecuqilluteng tamarmeng kina unegtevkenani.

¹²Nutaan-llu ukverluteng ATANREM akqutkellrinek; aturpagluteng-llu nanraraat.

¹³Tau͡gaam ak'anun pivkenateng caliallri nalluyagutait, canek-llu pilaagyungluteng ayuqucirtuutainek utaqalgirpek'nateng.

¹⁴Neqkegciyuumingellruut tamaani yuilqumi, tuaten-llu piluteng naspaaluku Agayun;

¹⁵taumek elliin cikillrukai kaigatkellratnek, tau͡gaam cali naulluun cakneq cirlaurrnarqelria ellaitnun tuc'etellrua.

¹⁶Yuilqumi tamaani ciknakellruat Moses-aaq cali-llu Aaron-aaq, allakaumalria kevgiurnaluku ATANEQ.

¹⁷Tua-i-llu nunam qupluni igaa Dathan-aaq patuluku-llu Abiram-aaq ilai-llu;

¹⁸keneq-llu cali pakmaken igcami maligtestaitnun ekuagai tamakut assiitellriit yuut.

¹⁹Sinai-ami kuluvagualillruut suulutaamek, agayuluteng-llu taumun agayutnguamun;

²⁰navrutaat ucurnarqucia Agayutem ungungssim ayuqiinun canegnek neq'legmun.

²¹Nalluyagulluku Agayun anirturilleq ellaitnek caliamikun irr'inarqelrianek Egypt-aami.

²²Calillruuq ucurnarqellrianek Ham-am nuniini, cali-llu irr'inarqellrianek imarpiim Red Sea-m cen̄iini.

²³Agayun qanellrani yun'i piunrirciqniluki nakmikellran pisteknaluku, Moses-aam, aguagutellrua, eq'uqertengraan yui piunriisqevkenaki.

²⁴Tamatum kinguani nuna tamana iteryuumiitaat, ukvekenrilamegteggu Agayutem akqutii.

²⁵Tau͡gaam pelatekameggni uitaluteng qanemyuugartut, niicugpek'nateng ATANREM qanrutengraateng.

²⁶Taumek elliin ellmaaraunrilngurmek aarcirtullrukai qanrulluki tuquvkararkauniluki yuilqumi,

²⁷cekavtelluki-llu kinguvrit agayumanrilnguut nunaitnun, tuquvkarluki nunakenrilkaitni.

²⁸Tuamta-llu Peor-ami uitallermeggni ilautellruut agayutulinun Baal-aamun, nerluteng-llu elliitekumallernek unguvanrilngurnun agayutnun.

²⁹ATANEQ-llu qenngevkallruat ayuqucimegteggun, kiituani cangerlagpiim tutai.

³⁰Tau͡gaam Phinehas-aam anucimirqecetaallrui pinarqutengqellriit, cangerlak-llu Agayutem pellugtelluku.

³¹Phinehas-aam-llu una assilria pillra elliinun umyuaqutnguuq, umyuaqutnguarkauluni elliinun kesianek.

³²Cali-llu ATANEQ qenqercetellruat Meribah-mi mermek ulvelriartalegmi, Moses-aaq-llu picurlallruuq ellaita pivkaatni.

³³Cakneq qenercecatni umyuangcarraarpek'nani qanlaagallruluni.

³⁴Yuut-llu Agayutmun ukvenrilnguut tuqutellrunritait, ATANREM alerqullruciatun,

³⁵tau͡gaam ilaliutaqluteng tamakunun yugnun agayuyaraitnek-llu piciryarangluteng.

³⁶Agayulangluteng tamakut agayutnguaritnun, negamun naptellriatun ayuqluteng.

³⁷Elliitek'langluki-llu tuqutarkauluki irniateng Canaan-aarmiut agayutnguaritnun.

³⁸Pinarqutailnguut mikelnguut tuqutellruit, menuurrluku-llu nuna tuaten tuqurqillermegteggun.

³⁹Ellmeggnek menuurrluteng tuaten pillermegteggun, ayuqucimegcetun akissutun ayuqliriluteng.

⁴⁰Tua-i ATANREM qenrutellrui yun'i; umyualngunaqluteng elliini.

⁴¹Teguaqsagutelluki-llu agayumanrilngurnun; inglukestaitnun atanirtungevkarluki.

⁴²Inglukestaita-llu nanglluki, ingluliurciigalivkarluki.

⁴³Amllerqunek ATANREM aviutelaryaaqluki, tau͡gaam ingluliuryugluku assiilngillermegteggun arcariinartut.

⁴⁴Tuatnangraata ATANREM nallunguaqsaitelaraa nangteqellrat, niitaqamiki qayagauraqata.

⁴⁵Ellait pitekluki umyuaqaa akquyutni, kenkeqapigcamiki-llu piqatallni ellaitnun pinricen̄allrua.

⁴⁶Teguaqestaitnun-llu tamalkuitnun takumcuyagutelluki.

⁴⁷ATANEQ Agayutemta, anirturkut, utertelluta-llu nunamten̄un, quyaviknaurput tanqilria atren angnirluta-llu nanrarluten.

⁴⁸Nanraumali ATANEQ, Israel-aam yuin Agayutiit; nanraumali watua cali-llu akwarpak! Yuut-llu tamarmeng qanqilit, “Amen!” Nanrarciu ATANEQ!