Read Yupik Psalm 107 Bible Online

Psalm 107 - Yupik bible

Psalm 107

¹“Quyavikiciu ATANEQ, assilriaruan; kenkillra-llu yugnek nangengaunani!”

²Mat'umek ataam qanerci, tamarpeci elpeci ATANREM anirtullrini. Inglukestevcen̄ek elliin aviutellruaci

³ut'rutellruaci-llu nunakenrilkevcen̄ek, calaramek, kanaknermek, negeqvamek, ungalamek-llu.

⁴Ilait calligtaallruut yuilqumi nunakarniilngurmi, nunakameggnek nalaqutesciiganateng.

⁵Kaigluteng, meqsugluteng, kiituani neryuniurutairutut.

⁶Nanikuallermeggni kaigallruut ATANERMUN, elliin-llu niilluki aviutai nanikuallratnek.

⁷Ciuliqagtai-llu caqiatevkenaki nunarpagnun uitavigkaatnun.

⁸Quyaviknarqaat ATANEQ kesianek kenkesteteng, yugnun assiqapigtellriit caliari pitekluki.

⁹Meqsuirucet'larai meqsulriit kailriit-llu neqkegcivkarluki nerevkaraqluki.

¹⁰Ilait yuut uitallruut tan'gercetqapigtellriami, nangteqluteng itercivigmelameng kalivnerciumaluteng,

¹¹Agayutem qanellranun inglulitellrulliniameng ayuqucirtuutai-llu cakaarluki.

¹²Cirlaurtellruut cakviurluteng calivakaameng; iquange'rmeng ikayurtekaunateng.

¹³Tua-i-llu nanikuallermeggni kaigallruut ATANERMUN, elliin-llu niilluki aviutai nanikuallratnek.

¹⁴Tan'gercetqapigtellriamek anutellrui kalivnertait-llu navgurluki ciqumlluki.

¹⁵Quyaviknarqaat ATANEQ kesianek kenkesteteng, yugnun assiqapigtellriit caliari pitekluki.

¹⁶Navgurai punerneret ikirtuqait kepurluki-llu caviit canirutait.

¹⁷Ilait usviinateng assiilngirpakaameng nangteq'ngellruut, assiilngurmek caliarata naulluuvkarluki;

¹⁸neqkat tamalkuita qessayagulluki tuqullerkarteng canimellian.

¹⁹Tua-i-llu nanikuangameng kaigallruut ATANERMUN, elliin-llu anirturluki nanikuallratnek.

²⁰Qanllermikun canrircetai anirturluki tuquarkauyaaqellratnek.

²¹Quyaviknarqaat ATANEQ kesianek kenkesteteng, yugnun assiqapigtellriit caliari pitekluki.

²²Quyassuutnek elliikilit, yuarutetgun-llu nunanirqellriatgun qalarutekluki elliin caliaqellri.

²³Ilait-llu ayalallruut imarpigkun sun'atgun, yuungnaqutekluku imarpiliullerteng.

²⁴Tanglarait-llu caliari ATANREM, irr'inarqelriit caliari imarpigmi.

²⁵Qanllermikun anuqengevkaraqluku, imarpik qailingevkarluku.

²⁶Qairet nalugaqluki sun'at qulvanun, ellurluteng-llu cali aciqvanun. Alingnaqngan sun'am yui ciunerkairut'lartut;

²⁷ayalualuteng iqualuteng tuaten taangiqellriatun, imarpiliuneq nallunrilngermegteggu cacirkaunateng.

²⁸Nanikuangameng-llu kaigaluteng ATANERMUN, elliin-llu niilluki anirturluki nanikuallratnek.

²⁹Elliin quunengevkaraa, qailinrirtelluku.

³⁰Taukut-llu quyaluteng quunengan, Agayutem-llu assirluki ciunicelluki ayagviatnun.

³¹Quyaviknarqaat ATANEQ kesianek kenkesteteng, yugnun assiqapigtellriit caliari pitekluki.

³²Qalaruteknarqaat artuqailucia yuut quyungqallratni agayuvigmi, nanrarluku-llu ciulirneret quyungqalriit takuatni.

³³Kuiget kinercet'larai nunallrit qau͡gyaurtelluki, nunam-llu akuliinek ulvelriit mer'et ulvenrircetaqluki.

³⁴Naungignarqellrungraan nuna taryungevkarluku caunrircetellrua, tua-i-wa tamaanelnguut yui assiitqapigcata.

³⁵Kinertellria nuna mertangevkalaraa, mer'ilnguq-llu nuna ulvelriartangevkarluku.

³⁶Kainiqellriit yuut tamaani uitavkalarai, ellait-llu nunaliluteng uitavigkameggnek.

³⁷Naucetaarviliut nauceciiluteng-llu wine-arkanek, amllernek-llu naugiluteng.

³⁸Agayutem yun'i atawaqercecateng amllernek yung'ut; ungungssiutait-llu ikegliyuunateng.

³⁹Agayutem yui inglukestaita cirlakellraceteng kasnguyullruut; picurlagcecimaluteng nangtauluteng-llu.

⁴⁰Elliin-llu eq'ukutni nasvagaa nangtestaitnun; tarracelluki yuilqumi kinertellriami nunakarniilngurmi.

⁴¹Tau͡gaam aviutai caitulriit nangteqellratnek yugyangevkarluki amlleriinartelluki ungungssiartun katngagtun.

⁴²Yuut ellualriit man'a tangerrluku angnirtut, tau͡gken assiitellriit yuut nepaircimaluteng.

⁴³Kia imum umyuartukuni murilkeciqai makut; umyuangcautekluku-llu ATANREM pektayiilnguq kenkii.