Read Yupik Psalm 109 Bible Online

Psalm 109 - Yupik bible

Psalm 109

¹Nanraq'ngamni elpet, Agayun! uitavkenak piicauteka niisgu!

²Assiitellriit iqlungalriit-llu curugaatnga. Piciunrilngurnek picilirturaatnga

³eq'ukutnek-llu qalarrluteng tungemnun, caulineqlua camek pitkaileng'e'rmeng.

⁴Ingluliuraatnga kenkengramteng piicautelangramteng-llu.

⁵Assilriatgun pingramteng assiitellriakun akinauraqlua; kenkengramteng eq'ukaqlua.

⁶Cucuklia piciunrilngurmek cuqcistem̄ek apqaurtekaanek inglukestem̄a, picetaarutelluku elliin inglukestiinun.

⁷Qanercetaarumakan pinarqellriarunikilitgu; piicagyaaqekan-llu assiilngirniluku!

⁸Tamaa-llu tuqukili; allam-llu tukuutai piksagulluki!

⁹Irniari-llu elliraureskilit nulirra-llu aipainrurrluni!

¹⁰Irniari calliggluteng cikircetaatuliureskilit; ataki-llu ancimaluteng imumalrianek enenek uitavimeggnek!

¹¹Akiilngirvik'lallran uayaaqiliu, allanret-llu piksagulluki caliamikun unangkengallri.

¹²Kia watqapik takumcukenrilkiliu wall'u irniari elli'iraurtellret aulukluki.

¹³Kinguvri tamarmeng tuqukilit, elliin-llu atra neq'akumanriqili kinguliarin ciuqliitni.

¹⁴ATANREM-llu neq'akekiliu ciuliarin assiiluciat, aanii-llu au͡g'aritevkenaku assiilnguinek.

¹⁵ATANREM nalluyagutenrilkiliki assiilnguit, ellait tau͡gaam yuut nalluyagutqapiggluki pikilitki!

¹⁶Tuaten takumcukiyuunani yuullruuq; tau͡gaam nangcilriaruluni tuqucilriaruluni-llu arrsaulrianek, casciigalngurnek, enuqitellrianek-llu.

¹⁷Aniqlaagiyunqeggucimitun ellii-llu aniqlaamakili! Atawaqaasqillerkani-llu eq'ukellrua taumek ellii-llu atawaqaasqumanrilkili!

¹⁸Aniqlaagillni atullrua aturaqellriatun; ataki aniqlaagiyullra temiinun meciuskili mertun, uqutun-llu cali enrinun meciulluni!

¹⁹Aniqlaatet aturatun patumakilitgu, tamakunek naqungqauralriatun ayuqluni!

²⁰ATANEQ, waten ayuqellrianek akiliqiki inglukestenka— assiitellrianek qalarculriit tungemnun!

²¹Tau͡gaam, elpet Agayun Atanema, ikayuqia akqellrucirpetun, aviullua kenkevgun assilriakun.

²²Wiingau͡rluq arrsaugua enuqillua; umyuamkun cakneq akngiringalua.

²³Atakumi talinertairut'lauciatun catairutqatartua; evcuusngalua ciissitun.

²⁴Nereksaitellma ciisqugka piniarutak; kemgiutqapiarlua tuaten.

²⁵Yuut tangrraqamegten͞ga temcik'laraatnga; qamiquteng tuaten ungaulugtaqluki qumliklua.

²⁶Ikayurnga, ATANEQ Agayutmaa! kenken nangyuilan anirturnga!

²⁷Inglukestemnun nallunritevkarru elpenun tau͡gaam anirtuuciqa.

²⁸Aniqlaayaaqeciqaatnga, tau͡gaam elpet atawaqerceciiqerpenga. Ataki nangtestenka cirliqkilit, wiinga-llu pistevni angnirlua.

²⁹Kiaresngiacaram patumakiliki inglukestenka; kasnguyullerteng aturluku aturatun qallirtun.

³⁰Neptulua quyaciqua ATANERMUN; Nanrarciqaqa yugugaat quyungqalriit takuatni,

³¹arrsaulriit anangnaqutelaaki, anirturaqluki pinarqucirluki tuqucimallerkaatnek.