Read Yupik Psalm 119 Bible Online

Psalm 119 - Yupik bible

Psalm 119

¹Atawaqertut canganarqutailnguut ayuqucimegteggun, yuulriit aturluki alerquutai ATANREM.

²Atawaqertut picirkiutain aturtait, niisngaluteng umyuamegteggun tamalkirrluteng.

³Assiilngurmek atuqsaunateng, tau͡gaam ATANREM tumkiurai maliggluki.

⁴ATANEQ, cikillruarpekut picirkiutevnek alerqurluta-llu atuusqelluki kesianek.

⁵Waniwa-tuq wiinga ayuqucimkun caqtaarpek'nii aturlaki ayuqucirtuuteten.

⁶Tuaten niisngakumki alerquuteten tamalkuita kiaresngiatellerkamnun tekisngailama.

⁷Wiinga nanrarciqamken tamalkirrlua yuucimkun, elitellemni piciulrianek picirkiutevnek.

⁸Alerquuteten aturciqanka; cakaaryaqunii!

⁹Qaillun piluni ayagyualria ayuqucimikun menuicugngaa? Murilkelluni yuullermikun qaneryaraten cuqekluki.

¹⁰Yuucimkun wiinga tamalkirrlua kevgiungnaqamken; iqlutmun ayagcecaqunii cakaarluki alerquuteten.

¹¹Qaneryaran qemagtellruaqa ircaqumnun, nallutmun tungevnun assiilngurmek taqutenritnalua.

¹²Nanraramken wiinga elpet, ATANEQ; elitnaurnga picirkiutevnek!

¹³Wiinga egmirciiqanka neptulua tamalkuita alerquutet cikiutekelten.

¹⁴Picirkiutvet atullrat nunanikaqa, tukuuterugarni arcaqanruluteng wangni.

¹⁵Umyuangcautekciqanka alerquuteten, yuvrirluki-llu ayuqucirtuuteten.

¹⁶Nunanikanka alerquuteten; cakaarngaunaku-llu qaneryaran.

¹⁷Assilriakun aulukia pistevni, yuunaurtua qaneryaran aturluku.

¹⁸Uiskek iigka, tangerrnaunka irr'inaqluteng piciulriit alerquutevni.

¹⁹Allanrulriatun ikgetuq maani nunami uitaqallerkaqa; iiryaqunaki alerquuteten wangnek.

²⁰Yuucimkun piyuumiqapigtua; pisquteten piksugyaaqanka kesianek.

²¹Elpet nunularaten pivakellriit; aniqlaamaut narurcilriit alerquutevnek.

²²Qumlikevkanrilnga picingssautekevkarpek'nii-llu ellaitnun, niisngallruamki alerquuteten.

²³Atanerruat quyurrluteng picirkiulartut assiilngurmek wangnun, tau͡gaam umyuangcautekciqanka picirkiuteten.

²⁴Elpet elitnauruteten nunanikanka; wiinga ayuqucirturtekngamki.

²⁵Urr'armi taklaunga tuquqatarlua; ataam pinirivkarnga elpet akqellrucirpetun.

²⁶Ayuqucimnek apervikuallemni elpet kiullruarpenga; elicungcarnga pisqutevnek.

²⁷Ikayurlua taringevkarki wangnun alerquuteten, umyuangcauteknianka irr'inarqellriit elitnauruteten.

²⁸Angniipakallma tuquyarpiarcetaanga; pinirivkarnga akqellrucirpetun.

²⁹Nayumiqakia iqlutmun ayagcetevkenii, assiucin-llu aturluku alerquutevnek elicungcarnga.

³⁰Niisngallerkaq wiinga cucukaqa; nallunguanritanka picirkiuteten.

³¹ATANEQ, ayuqucirtuuteten maligtaqullruanka; kasnguyullerkamnun tekicecaqunii.

³²Tengrukluki aturciqanka alerquuteten, tua-i-wa taringelalqa ilaciqngavgu.

³³ATANEQ, kangingevkarki wangnun alerquuteten, atularnianka kesianek.

³⁴Taringyugngavkarru alerquuten wangnun, tamalkirrlua ircaqumkun aturniarqa.

³⁵Niisngalriaruvkarlua alerquutevnek, angniutekngamku wiinga atullrat.

³⁶Piyuumiutekevkarru-llu wangnun picirkiutvet atullerkaat, tukuurtellerkaqa arcaqakevkenaku.

³⁷Ayarivkarpek'nii caugarkaunrilngurnek; assilria piuvkarluku wangni, akqellrucirpetun.

³⁸Akqutkellren wangnun kevgarpenun piciuvkaqiu, niisngastevnun tuaten piciuvkalaucirpetun.

³⁹Wangnun tuc'ecaqunaki caunrilkuurutait, uluryakngamki; picirkiuteten elpet assilriaruut.

⁴⁰Wiinga niisngalriaruyugtua picirkiutevnek; ellualriarucirpeggun unguvamek nutaramek cikirnga.

⁴¹ATANEQ, kenken cakaniyuilnguq wangnun nasvaggu, anirturlua-llu akqellrucirpetun.

⁴²Kiutekangqerrniartua caunrilkestemnun, wiinga cacetuqutekngamku qaneryaran.

⁴³Piciucirpenek qalartellerkaqa pivingqerrlainarteskiu, tua-i-wa cuqciyaran tusngavikngamku.

⁴⁴Alerquuten niisngarrlainarciqaqa akwarpak akwanun.

⁴⁵Yuuciqua inglukestemnek umyuarniurutaunii, tua-i-wa niisngangnaq'laamki ayuqucirtuuteten.

⁴⁶Qalarutkelarciqanka-llu alerquuteten atanernun kiaresngialutaitniartua.

⁴⁷Ilukegcitkaqa alerquutvet atullrat, tua-i-wa kenekngamki.

⁴⁸Qigcikanka kenekluki-llu alerquuteten; taumek wiinga umyuangcautekciqanka.

⁴⁹Umyuaqiu akqutkellren wangnun pistevnun, neryuniurutka taumun tusngiin.

⁵⁰Nangteqellma-llu nalliini caceturcimalartua akqutevgun unguvamek cikiumiivnga.

⁵¹Ucuryagtellriit yuut caunrilkuurturalaraatnga, tau͡gken wiinga avteksaunii alerquutevnek.

⁵²ATANEQ, umyuaqelaranka picirkiuteten ak'allaat, caceturivkalaraatnga-llu.

⁵³Tangvagluki yuut assiitellriit picirkiutevnek cakaarilriit umyuaqa assiitelartuq.

⁵⁴Carrarmi maani nunami unguvaqallemni yuarucilartua apalluqluki alerquuteten.

⁵⁵Unugmi-llu umyuaqelaramken, ATANEQ, alerquuteten-llu umyuamnetaqluteng.

⁵⁶Angnillerkaqa tekitelaraqa atullratgun picirkiutvet.

⁵⁷Elpet kiivet piyugamken, ATANEQ; akqamken niisngayugluki alerquuteten.

⁵⁸Umyuamkun tamalkirrlua kaigavikamken naklekesqellua akqellren aturluku!

⁵⁹Umyuangcautekellruaqa ayuquciqa, akqilua-llu maligtaqunaluki ayuqucirtuuteten.

⁶⁰Atatakutevkenii patagmek aturyuganka picirkiuteten.

⁶¹Yuut assiitellriit napcetengnaqsaaqaatnga tau͡gaam wiinga cakaaqsaitaqa alerquuten.

⁶²Unuum qukaani maktelartua nanrarnaluten ellualriaruata picirkiuteten.

⁶³Qigcikestevnek alerquutvet-llu aturtaitnek yugnikek'ngangqertua.

⁶⁴ATANEQ, nuna muirumauq nangyuilngurmek kenkevnek; ayuqucirturnga wiinga alerquutevnek.

⁶⁵Akqellrucirpetun, ATANEQ, pistekngavnga assirlua aulukarpenga.

⁶⁶Cikirnga umyuartunermek elisngamek-llu, alerquuteten cacetuqutekngamki.

⁶⁷Anucimirqecetaarpailegpenga iqlutmun ayallruunga, tau͡gaam watua qaneryaran niisngariaqa.

⁶⁸Assirpaa elpeni, takumcutarpaa! Elicungcarnga picirkiutevnek.

⁶⁹Ellmeggnek pivakellriit yuut iqluurutkelaraatnga, tau͡gaam umyuamkun tamalkirrlua niisngaanka ayuqucirtuuteten.

⁷⁰Makut yuut taringumanritait alerquuteten, wangni tau͡gken ilukegcinarqelriaruluteng.

⁷¹Anucimirqecetaarutka ikayuutnguuq wangnun, nallunrircecaki alerquuteten.

⁷²Alerquutet-llu wangnun cikiutekelten wangni piyugnarqenruluteng akirugarni.

⁷³Elpet unatevgun elucilirlua piliaqellruarpenga; taringumallerkamnek cikirnga elitnianka alerquuteten.

⁷⁴Qigcikestevvet tangerqunegten͞ga angnirciqut, cacetuqutekngamku akquten.

⁷⁵ATANEQ, nallunritua elluarrluten cuqcilaucirpenek, anucimirqecetaallruarpenga-llu piciucin pillerkiurarpenun aturluku.

⁷⁶Akqellrucirpetun wiinga pistevni, caceturivkaqia kenkevgun pektayiilngurkun.

⁷⁷Takumcukia unguvaniartua, wiinga-wa angniutekngamku atullra alerquutvet.

⁷⁸Ucuryagtellriit iqluuruteklua picilirtenka kiaresngialkilit; wiinga tau͡gaam umyuangcautekciqanka alerquuteten.

⁷⁹Qigcikesteten taivkarki wangnun, elitnaurluki nallunrirniarait alerquuteten.

⁸⁰Ataki pitacirramtun atuqilaki alerquuteten, cirlakumalriim kasnguyullra atunritniarqa.

⁸¹ATANEQ, nerinipakaama elpenek anirturtekamnek cayuumiirutua; neryuniurutkaqa qanellren.

⁸²Iituumarma mernunglua utaqalgirlua akqutkellerpenek, aptaqlua, “Qaku ikayuqatarcia?”

⁸³Cakarniilngurtun caqukuallertun egingalriatun ayuqliriunga, tau͡gken nalluyaguteksaunaki alerquuteten.

⁸⁴Qaillun pitalriamek utaqalgiqatarcia? Qaku-llu anucimirqecetaaqatarciki nangcilriit wangnek?

⁸⁵Ucuryagtellriit, niisnganrilnguut alerquutevnek, petmililuteng pitaqengnaqaatnga.

⁸⁶Alerquuteten tamarmeng atuyunarqut; yuut iqluuruteklua nangtaatnga; ikayurnga!

⁸⁷Tuqutengnaqvakarlua tuqucarpiaraatnga, tau͡gaam cakaaqsaitanka alerquuteten.

⁸⁸Kenken pektayiilnguq aturluku tuquvkaryaqunii, niisngaluki alerquuteten yuuniartua.

⁸⁹ATANEQ, qaneryaran piugarkauguq iquilngurmek; nangyuilnguungami qilagmi.

⁹⁰Elpet-wa piciurrlainarciqellriaten yugnun; nuna pektaararkaunrirluku uitallerkiullruan, tuaten-llu uitaluni.

⁹¹Cat tamarmeng man'a tekilluku uitaut pisqellerpetun, tamarmeng kevgiulriaruameng elpenun.

⁹²Angniutengqenrilkuma alerquutevnek, nangtequtma ak'a tuqutellruyaraatnga.

⁹³Wiinga cakaarngaitqapigtanka ayuqucirtuuteten; tamakutgun unguvamek cikiumiivnga.

⁹⁴Elpet pikngavnga anirturnga; niisngangnaq'laranka alerquuteten.

⁹⁵Yuut assiitellriit nayuraatnga tuqutnalua, wiinga tau͡gaam umyuangcautekciqanka alerquuteten.

⁹⁶Nallunrirtua cat tamarmeng engelengqerrameng piunrillerkaatnek; alerquuteten tau͡gken iquklisngaunateng.

⁹⁷Wiinga alerquuteten kenkanka cakneq! Ernerpak-llu umyuangcautekuralaranka.

⁹⁸Alerquuteten wangnetauralaameng umyuartunruvkalaraatnga inglukestemni.

⁹⁹Taringumanrulartua-llu tamalkuitni elitnaurtemni, umyuangcautekuralaamki ayuqucirtuuteten.

¹⁰⁰Umyuartunrulartua-llu tegganerni, niisngiimki alerquuteten.

¹⁰¹Ayuqucirrliqsarat tamalkuita avitelaranka, niisngayuamku qaneryaran.

¹⁰²Nallunguaqsaitanka ayuqucirtuuteten, elpet tau͡gaam elitnauristekngamken.

¹⁰³Neqnirqellriatun ayuqut naspaallrat ayuqucirtuutvet— paatakaami-llu neqnirqenruluteng.

¹⁰⁴Alerquutvet taringumavkalaraatnga, taumek eq'ukekeka tamalkuan ayuqucirrliqsaraq.

¹⁰⁵Qaneryararpet kenurratun ciuliqagtaatnga, tanqigiluku tumkaqa tamalkuan.

¹⁰⁶Wiinga akqutka aturciqaqa, ayuqucirtuuten ellualria aturyugluku.

¹⁰⁷ATANEQ, ilumun nangteqeqapigtua; elpet tau͡gaam unguvavkaqia akqellrucirpetun.

¹⁰⁸ATANEQ, ciuniurki nanrautenka elpenun, elitnaurlua-llu alerquutevnek.

¹⁰⁹Upingarrlainartua unguvaka qunukarkauvkenaku; wiinga nalluyaguteksaitanka alerquuteten.

¹¹⁰Assiitellriit yuut pitaqengnaqlua negalilaryaaqut, tau͡gaam wiinga picirkiuteten unitaaqsaitanka.

¹¹¹Alerquuteten paitaqluki piku'urciqanka kesianek; wiinga cakneq angniutekanka.

¹¹²Wiinga cucuklillruunga niisnganaluki alerquuteten tuqunatkamnun.

¹¹³Eq'ukanka yuut malrugnek umyualget tungevnun, tau͡gaam wiinga kenkanka alerquuteten.

¹¹⁴Elpet wiinga iirvikamken capkutaqluten-llu; neryuniurutengqertua akqutkellerpenek.

¹¹⁵Ayagci wangnek, assiilngurnek calilriani, kevgiuqengama Agayutem alerquutai aturnianka.

¹¹⁶Piniliumanga akqellrucirpetun, unguvaniartua; neryuniullemni qacuvallagcecaqunii!

¹¹⁷Nayumiqanga, cam pinritniaraanga, murilkuralarnianka alerquuteten.

¹¹⁸Elpet ciuniuyuitaten alerquutvet niisnganritestait; piciunrilnguut picirkiurait catngungaitut.

¹¹⁹Elpeni assiitellriit yuut ciqitarkatun ayuqut, taumek kenkekenka alerquuteten.

¹²⁰Wiinga uulegtua alinglua elpenek; uluryayuglua cuqciyararpenek.

¹²¹Elluarrlua piciulua-llu pingnaqurallruunga; pegcaqunii nangtestemnun!

¹²²Akqia ikayurarkaulua pistevni; ucuryagtellrianun yugnun nangcecaqunii.

¹²³Utaqalnguunga elpenun anirtullerkamnek, akqutkellerpenek nerinillua aviuciiqnilua.

¹²⁴Kenken pektayiilnguq aturluku aulukia, elitnaurlua-llu alerquutevnek.

¹²⁵Wiinga pistekarpenga; taringumallerkamnek cikirnga, nallunritnaunka elitnauruteten.

¹²⁶ATANEQ, uitayunairutaaten, narurciata yuut alerquutevnek.

¹²⁷Suulutaami assinkacagarmi kenkenruanka alerquuteten.

¹²⁸Taumek maligtaqulaqenka tamalkuita ayuqucirtuuteten; eq'ukanka piciunrilnguut piciryarat.

¹²⁹Elpet ayuqucirtuuteten assinqestaitut; wiinga niisngaanka umyuamkun tamalkirrlua.

¹³⁰Qaneryaraten yugnun maniaqavki ellaitnun tanqiulartut, yuut elisnganrilnge'rmeng umyuarturiaqluteng.

¹³¹Aitarma anerteksaaralriatun ayuqua, piyugyaaqem ugaani alerquuteten.

¹³²Tuiggviklua takumcukia wiinga, kenkesteten tuaten pilaucirpetun.

¹³³Akqellren aturluku iquvkaryaqunii; assiilnguq atanruvkaryaqunaku wangni.

¹³⁴Anirtuqia nangtestemnek, alerquuteten aturnianka.

¹³⁵Nayurlua atawaqertessnga elitnaurlua-llu alerquutevnek.

¹³⁶Wiinga aluviliurtua cakneq, yuut-wa narurciata alerquutevnek.

¹³⁷Ellualriaruavet, ATANEQ, cuqcilartuten ellualriakun.

¹³⁸Alerquuteten cikiutekelten ellualriaruut piciulriaruluteng-llu.

¹³⁹Eq'urtelqa ilumni ekualriatun ayuquq, inglukestem̄a caukenrilatki alerquuteten.

¹⁴⁰Akqutkellren wangnun piciuqapigtuq! Wiinga-llu kenkeqapiggluku!

¹⁴¹Wiinga cakegtaunritua caunrilkumalua-llu, tau͡gaam ayuqucirtuuteten cakaaqsaitanka.

¹⁴²Elpet ellualriaruuten akwarpak, alerquuten-llu piciulriaruluni.

¹⁴³Wiinga picurlagalartua nanikuagaqlua-llu, tau͡gaam alerquutvet angnirivkalaraatnga.

¹⁴⁴Alerquuteten elpet ellualriaruut akwarpak; wiinga taringumallerkamnek cikirnga, unguvanaurtua.

¹⁴⁵Umyuamkun tamalkirrlua qayagauramken; ATANEQ, kiunga niisnganianka alerquuteten!

¹⁴⁶Wiinga qayagauramken; anirturnga, alerquuteten aturnianka.

¹⁴⁷Erpailgan maklua qayagaularamken ikayuusqellua; neryuniurutengqertua akqutevnek.

¹⁴⁸Unugpak tupaumalua umyuangcautek'laranka ayuqucirtuuteten.

¹⁴⁹Kenken nangyuilnguq aturluku niisnga, ATANEQ; takumcukuten aturluku unguvavkarnga!

¹⁵⁰Yuut caunrilkilriit alerquutevnek mallgaatnga, umyuarrliqullua nangtestekama.

¹⁵¹Tau͡gaam, elpet ATANEQ, canimnetuten, alerquuteten-llu cakanirngaunateng.

¹⁵²Akaurtuq nallunrilqa ayuqucirtuutevnek; taqellruavki akwarpak piugarkauvkarluki.

¹⁵³Tangrru nangteqelqa, anirturlua-llu, cakaaqsailamki alerquuteten.

¹⁵⁴Pinarqutaitellerkamkun ikayurnga aviullua-llu; anirturnga akqellrucirpetun.

¹⁵⁵Assiitellrianek calilriit anirtuumangaitut, niisnganrilamegteki alerquuteten.

¹⁵⁶ATANEQ, naklekilaucin angelriaruuq; anirturnga ellualriarucin maniluku wangnun.

¹⁵⁷Inglukestelirtua nangtestelirlua-llu, tau͡gaam pinriteksaunii aturanka alerquuteten.

¹⁵⁸Umyualngulartua tangrraqamki piciunrilngurnek calilriit, alerquuteten atunrilatki.

¹⁵⁹ATANEQ, tangrru kenkiciqa ayuqucirtuutevnek. Anirturnga kenken cimiyuilan!

¹⁶⁰Qaneryaraten tamarmeng piciulriaruut, cuqciyaran-llu ellualria piugarkauluni akwarpak.

¹⁶¹Camek pitkaitelange'rma nangtelaraatnga atanerruat, tau͡gaam wii qigcikaqa alerquuten.

¹⁶²Angnirtua akqutkelten pitekluki— tukuutekamek nalkutellriatun.

¹⁶³Eq'ukanka umyualngukluki-llu iqluurutet, tau͡gaam kenkaqa alerquuten.

¹⁶⁴Ernerpak malrunlerqunek quyavik'laramken cuqciyaraten ellualriaruata.

¹⁶⁵Alerquutvet kenkestai uitanqegcitengqertut angelriamek, cam-llu picurlagtessngaunaki.

¹⁶⁶ATANEQ, anirturillerkan wangnek neryuniurutkaqa, alerquuteten-llu aturluki.

¹⁶⁷Niisngaanka ayuqucirtuuteten; kenkanka umyuamkun tamalkirrlua.

¹⁶⁸Niisngaanka picirkiuteten ayuqucirtuuteten-llu; calqa tamalkuan tangvagan.

¹⁶⁹Ikayuusqellua qayagaurutka ciuniurru, ATANEQ! Taringumallerkamnek cikirnga akqellrucirpetun.

¹⁷⁰Kaigatka ciuniurru; anirturnga akqellrucirpetun!

¹⁷¹Nanrarrlainarciqamken, alerquutevnek elitnaulaavnga.

¹⁷²Yuarutkeciqaqa alerquuten, picirkiuteten tamarmeng pitalqeggata.

¹⁷³Ikayurillerkan wangnek upingaterrlainarru, maligtaquamki alerquuteten.

¹⁷⁴ATANEQ, anirtuutevnek piyuumirtua! Alerquuteten-llu angniutekanka.

¹⁷⁵Unguvavkarnga nanrarniamken; ataki ayuqucirtuuteten ikayuqkilaki.

¹⁷⁶Qusngitun tamalriatun nanllikiartua; tailuten yuarnga wii pistevni, tua-i-wa cakaaqsailamki alerquuteten.