Read Yupik Psalm 136 Bible Online

Psalm 136 - Yupik bible

Psalm 136

¹Quyavikiciu ATANEQ assilriaruan; kenkii iquituq.

²Quyavikiciu Agayun angtatailnguq allani agayutni; kenkii iquituq.

³Quyavikiciu ATANEQ pinirtatailnguq allani atanerni; kenkii iquituq.

⁴Ellii kiimi calilartuq irr'inarqellrianek; kenkii iquituq.

⁵Umyuartutacini aturluku qiliit piliaqellrui; kenkii iquituq.

⁶Nuna piliaqellrua et'ulriit mer'et qaingitnun; kenkii iquituq.

⁷Piliaqellruak akerta iraluq-llu; kenkii iquituq;

⁸akerta erenrani tanqiusqelluku; kenkii iquituq;

⁹iraluq agyat-llu unugmi tanqiusqelluki; kenkii iquituq.

¹⁰Elliin tuqutellrui tan'gaurluut yung'eqarraarutait Egypt-aarmiut; kenkii iquituq.

¹¹Ciuliqagtellrui Israel-aam yui anulluki Egypt-aamek; kenkii iquituq;

¹²pinini artuqailnguq aturluku; kenkii iquituq.

¹³Avellrua imarpicuar Red Sea-aq; kenkii iquituq;

¹⁴ciuliqaggluki-llu yun'i tamaaggun; kenkii iquituq;

¹⁵tau͡gaam qecuqitevkarluki Egypt-aam atanra anguyagtai-llu; kenkii iquituq.

¹⁶Ciuliqagtellrui yun'i nunakun kinertellriakun; kenkii iquituq.

¹⁷Tuqutellrui ucurnarqengraata atanret; kenkii iquituq;

¹⁸niitnaulriarungraata atanret tuqurqellrui; kenkii iquituq;

¹⁹Sihon-aaq, Amorite-at atanrat; kenkii iquituq.

²⁰Og-aq-llu, Bashan-aam atanra; kenkii iquituq.

²¹Cikiutekellrui nunautait elliin yum'inun; kenkii iquituq;

²²cikiutekluki Israel-aam yuinun, elliin pistem̄inun; kenkii iquituq.

²³Cirliqlemta nalliini nalluyagutellrunritaakut; kenkii iquituq;

²⁴inglukestemten̄ek anagcetellruakut; kenkii iquituq.

²⁵Neqkaitnek cikilarai unguvalriit tamalkuita; kenkii iquituq.

²⁶Quyavikiciu Agayun atanirturilria qilagmek; kenkii iquituq.