Read Yupik Psalm 139 Bible Online

Psalm 139 - Yupik bible

Psalm 139

¹ATANEQ, nallunritarpenga ayuquciqa yuvriumiivgu.

²Cauralqa tamalkuan nallunritan; yaaqsing'e'rma taringumaaten umyuanka.

³Tangvagan tarritelqa mernuinercilqa-llu; caurallrenka tamalkuita nalluvkenaki.

⁴Qanerpailegma-llu camek qanqatauciqa nallunrit'laran.

⁵Avatairumalararpenga; pinirpegun cayailkuciumalua.

⁶Wangni irr'inarqelriaruuq nallunrilucin wangnek; tamatum-llu taringellerkaa caperqaqa.

⁷Natmun ayagyarcia qimaglua ciuqerpenek? Natmun canivnek ayagyarcia?

⁸Qilagmun mayuquma tuanciiquten; tuqumalrianun-llu ayakuma tuanciiqluten.

⁹Calaram tungiinun ayanger'ma wall'u yaaqsinqurraani kanavam uitang'e'rma,

¹⁰tuanciiquten ciuliqagcuumalua, tuanlluten-llu ikayuryuumalua.

¹¹Qaneryaaqsartua tan'germun iiresqellua wall'u tanqik avatemni unuurtesqelluku,

¹²tau͡gaam elpeni tan'geq catngunrituq, unuk-llu tanqigtaluni ernertun. Tan'geq tanqik-llu elpeni ayuquk.

¹³Tememni natka tamalkuan piliaqellruan; aanama engeliagkeni elucilillruarpenga.

¹⁴Nanraramken qigciknarqellriakun irr'inarqellriakun-llu taqutellruavet wangnek; calian tamarmi irr'inarquq. Elpet ayuquciqa tamalkuan nallunritan.

¹⁵Enrenka elucingellratni, tumarcimallratni aanama engeliagkeni, tuani iirumalua piurtellemni, elpet tuanluciqa nallunritellruan—

¹⁶tangerrlua yuurpailegma. Yuullerkama ernerkai ak'a igautellruluki kalikarpenun, ciuqliat ernerkama ayagnirpailgan.

¹⁷Agayun, umyuanguteten taringumasciigatut; amllerrameng-llu amllertaciinateng!

¹⁸Naaqekumki amllenruyartut qau͡gyami. Tupagaqama, cali pillgutekluten tuantelartua.

¹⁹Agayun, elpenun tuqutesqumalaryaaqanka assiitellriit yuut. Callugyulrianun-llu yugnun ilangciksaunii uitatesqumalaryaaqua.

²⁰Inglukluten tungevnun assiitellrianek qalartelartut; atren-llu tugerluku assiilngurnek qalartaqluteng.

²¹ATANEQ, eq'ukesteten cakneq eq'ukanka! Caunrilkanka ingluliurteten!

²²Umyuamkun tamalkirrlua eq'ukanka; inglukestekelriatun ayuqulluki.

²³Agayun, yuvrirlua umyuaqa nallunrilgu! Naspaalua nallunrirru canek umyuarteq'lalqa.

²⁴Yuvrirnga assiilngurmek atularyuartua ciuliqagglua-llu tumyarakun elpenek iqulegkun.