Read Yupik Psalm 145 Bible Online

Psalm 145 - Yupik bible

Psalm 145

¹Agayutekngamken Ataneqluten-llu, qalarutkeciqaqa angtatailucin yugnun; quyavikciqamken akwarpak akwanun.

²Erenret tamalkuita quyavikciqamken; nanrarciqamken akwarpak tayima.

³ATANEQ ucurnarqelriaruami nanrarnarquq; qaillun angtacia taringumasciigatuq.

⁴Kinguveqellriit kinguliarita-llu nanralarciqait caliaqelalten; ucurnarqellriit caliaten qalarutkeciqait.

⁵Ucurnarqucin takarnarqucin-llu qalarutkeciqaat, wiinga-llu umyuangcautekciqanka irr'inarqelriit caliaten.

⁶Yuut qalarutkelarciqait caperrnarqelriit caliaqelten, wiinga-llu qalarutkeciqaqa angtatailucin.

⁷Assilriarucin qalarutkelarciqaat yuarutekluku-llu naklegtaucin.

⁸ATANEQ kenkitartuq takumcutarluni-llu, qenqerrngianani kenkii-llu angelria pektayiinani.

⁹ATANREM yuut tamalkuita assirluki pilarai, takumcukluki-llu piliallni tamalkuita.

¹⁰ATANEQ, piliallerpet tamarmeng quyavikciqaatgen, yugpet-llu tamarmeng nanrarluten!

¹¹Qalarciiqut ucurnarqellriakun atanirturilaucirpenek qanrutekluku-llu pinilriarucin,

¹²nallunritesqelluki tamalkuitnun caperrnarqelriit caliaten, ucurnarqucia-llu angayuqauvigpet.

¹³Angayuqauviin akwarpak piuguq, atanirturillren-llu iquituq. ATANREM akqutkellni pinricen̄arngaitai; callermikun tamalkuan takumcutalriaruuq.

¹⁴Ikayularai picurlaumalriit; piniliumalarai qacuilriit.

¹⁵Tamarmeng unguvalriit neryuniurvik'laraatgen, elpet-llu neqkangqercet'laraten kaigaqata.

¹⁶Pitalqellriamek cikilaraten, camircetaqluki tamalkuita piyullritnek.

¹⁷ATANREM piciryarai tamarmeng ellualriaruut, takumcutarluni-llu callermikun tamalkuan.

¹⁸ATANREM ikayuryukaararai qayagaurten̄i, ilungluteng qayagauraqatni.

¹⁹Qigcikesten̄i piyuumiutaitnek cikilarai; qayagaaqata-llu niilluki anirtularai.

²⁰ATANREM kenkesten̄i cayailkuciumai, tau͡gaam piunrirarkaugai assiitellriit yuut.

²¹Wiinga nanrarrlainarciqaqa ATANEQ; tamarmeng piliaqellrin atra nanrarlitgu akwarpak tayima.