Read Yupik Psalm 18 Bible Online

Psalm 18 - Yupik bible

Psalm 18

¹[4] Kenkamken wiinga, ATANEQ, piniliumastekamken.

²ATANEQ wiinga cayailkuciumastekaqa; asvailnguq capkuciumasteka. Agayutkaqa cayailkutekluku, cam-llu pingaitaanga elliini uitakuma. Capkuciumalua akiuruciiqaanga; camun pivkarpek'nii.

³ATANEQ qayagaularaqa, elliin-llu anirtularaanga inglukestemnek. Nanraumali ATANEQ!

⁴Tuqum pitaqengnaqlua avataillruanga; qairpagtun-llu qagraviklua.

⁵Negatgun pissulriatun napcecaaqlua, tua-i tuqum waniwa unakeqatarlua.

⁶Nanikuangama qayagauraqa ATANEQ; Agayutka qayagauraqa ikayuusqellua. Agayuvimi-llu iluanek erinaka niicamiu; niicugnia kaigatka.

⁷Tua-i-llu nuna arulauq pekluni-llu; tusnganrit-llu ingrit arulaluteng pekluteng-llu, tua-i-wa Agayun qenercan.

⁸Aruvak-llu an'uq qengagkenek, piunririlria-llu keneq kumalriit-llu qetget anluteng qanrakun.

⁹Qilak ikirrluku atrartuq amirlutarluni mamtulriamek it'gagken aciagni.

¹⁰Cukaluni-llu tengaurtuq yaqulegpami qainganlluni;[5] ayagaluni anuqii uqumkarluku.

¹¹Caquuq ellminek tan'germek; mamtulriamek amirlumek mermek meciumalrianek avapailitarluni.

¹²Kenret teggalqut kenerpallagalriit-llu an'ut kalluum kenranek, tangerrnaqluteng amirlukun.

¹³ATANEQ-llu kallugtun eriniaguq qilagmek; Quyinruqapigtellriim erinii niitnaqluni.

¹⁴Pitegcautminek pitgaquluni cekavtai inglukesten̄i; kenerpallagavkarluku aqvaqurluki qimagcetai.

¹⁵Imarpiim terr'a alairutellruuq, nunam-llu cali tusnganri, nunullerpeni inglukesteten, ATANEQ, qanpagalluki eq'urrluten.

¹⁶ATANREM yaggluni pakmaken teguanga; nugtaanga et'ulriamek mermek.

¹⁷Aviutaanga pinilrianek inglukestemnek tamalkuitnek-llu eq'ukestemnek, tua-i-wa pininruata wangni.

¹⁸Picurlaumallma nalliini curularaatnga, tau͡gaam ATANREM cayailkuciumalaraanga.

¹⁹Ikayurlua aviutelaraanga aarnarqellriamek, anirturaqlua ilukegcitekngamia.

²⁰ATANREM nunulilaraanga cuqluku elluaruciqa; atawaqercet'laraanga camek pinarqutailama.

²¹Niisngallruamku alerquutii ATANREM; avteksaunii-llu Agayutmek.

²²Alerquutai atullruanka tamalkuita; pisqellri pinriteksaunaki.

²³Canganarqutaitelqa nallunritaa, umyuarniurutkamnek-llu atuqsaitelqa.

²⁴Taumek ATANREM nunulilaraanga elluaruciqa cuqluku, nallunrilamiu-llu pinarqutailuciqa.

²⁵Piciulrianun elpet nasvalaran piciucin; canganarqutailngurnun-llu canganarqutaunak.

²⁶Menuilngurnun menuilucin manilaran; tau͡gken piciunrilngurnun eq'ukuten.

²⁷Anirtularaten ellmikutuulriit, tau͡gken cali caunriraqluki ellmeggnek pivakellriit.

²⁸ATANEQ, elpet tanqigiarpenga; tan'geq wangnek au͡g'arluku.

²⁹Pinimek cikiutevgun anguyagnek cirlakiyugngaunga, casguliarit navgurluki.

³⁰Una Agayun tamaitgun natlugnerituq! Tusngaviknarqut qanellri! Capkutaulriatun ayuquq yualrianun uqisngavigkameggnek.

³¹ATANEQ kiimi Agayutnguuq; Agayutem kiimi camun pivkarngaitaakut.

³²Agayutnguuq, elliin pinirivkalaraanga, tumkaqa-llu aarnarqelriartairut'laraa.

³³Tuntuyagartun tuc'urivkalaraanga; quyilriani-llu ingrini picurlagceteksaunii.

³⁴Elitnaurlua uptelaraanga anguyallerkamnun, cagnilriamek urluvermek aturyugngarisqellua.

³⁵ATANEQ, elpet camun pivkaqsaitarpenga anirturlua-llu; anglirilua-llu elpet aulukngavnga, pinirpet-llu aarnailngurmi uitavkarlua.

³⁶Inglukestemnun teguvkaqsaitarpenga, cali-llu una tekilluku iquksaunii.

³⁷Inglukestenka maligtelaranka tegunatkamnun; arulaiyuunii-llu piunrirnatkamnun.

³⁸Iquavkaranka nangertesciigalivkarluki; tuqualuteng nunam qaingani.

³⁹Pinirivkalararpenga callukata'arqama, cirlakevkarluki inglukestenka.

⁴⁰Inglukestenka qimagcet'laraten wangnek; piunrilaranka-llu wii eq'ukestenka.

⁴¹Qayagauryaaqut ikayuusqelluteng, tau͡gaam anirturtekaitut; qayagauryaaqaat-llu ATANEQ, tau͡gaam elliin niitenritai.

⁴²Passianka urr'artun ayuqliriluki anuqem-llu tenglluki. Tutmaulluki-llu marayatun tumyarani.

⁴³Anirturarpenga ingluliculrianek yugnek atanirturilriarurrlua atanruvignun; nallukenganka-llu yuut atanirtungluki.

⁴⁴Yaaqvanek-llu allanret ciktelangut ciuqamnun; qanrutaqamteng niitaqlua.

⁴⁵Alingem tut'elarai, uuleggluteng taigaqluteng asvairqumalrianek uitavimeggnek.

⁴⁶ATANEQ unguvauq! Nanraumali ingluliurutesteka! Qalarutkiciu ucurnarivkarluku Agayun anirturteka.

⁴⁷Cirlakevkalarai inglukestenka; atanruviit-llu ingluliurcetevkenaki wangnun

⁴⁸anirturlua inglukestemnek. ATANEQ, elpet cirlakivkararpenga inglukestemnek, aarilngurnun yugnun pivkaqsaunii.

⁴⁹Taumek nanraramken angayuqauviit akuliitnek, aturlua-llu nanrautnek elpenun.

⁵⁰Agayutem cirlakivkaraa atanrulria elliin pini; kesianek kenkutni manimaa elliin cucukellerminun, David-aamun kinguvrinun-llu akwarpak tayima.