Read Yupik Psalm 2 Bible Online

Psalm 2 - Yupik bible

Psalm 2

¹Ciin angayuqauviit ciuliqagtait picirkiulartat ingluliurutkameggnek, umyuangcarluteng piciurtarkaunrilngurnek?

²Atanrit ingluliutuut, quyurrluteng-llu picirkiulartut ilikluki atanerruateng, inglulirluku Agayun cucukek'ngaa-llu ataneq.

³Qanerluteng, “Kepnaurput ciuliqagcillrat wangkutnek, atanirturcetenrirluta-llu.”

⁴Tau͡gaam angayuqauvimini qilagmi uitalriim engelarautekai, picirkiurait-llu caunrilkelluki.

⁵Nutaan-llu aarcirturluki eq'uqerrluni, alingallagtelluki piniat qamevkarluku, qanerluni,

⁶“Zion-aamun[1] qigcignarqelriamun qemimnun elkartellruaqa wiinga ataneq cucukelqa.”

⁷Tua-llu cucukellra ataneq qanertuq, “Qanruteknaurqa Agayutem wangnun qanellra. Waten qanrutaanga, ‘Elpet atanrulriami wiinga qetunraqamken. Mat'umi ernermi atanrurtellerpeni ataksagutarpenga.

⁸Qanrusnga camek piyullerpenek, wiinga-llu atanirturten͞gurciiqamken tamalkuitnun angayuqauvignun; ellarpak-llu tamalkuan piksagutevkarluku elpenun.

⁹Ataniumaciqaten-llu irr'inarqelriakun, caunrirluki-llu navguumalriatun qikutun qikuliurtem piliallratun.’”

¹⁰Kitaki, nunat atanritni, umyuartucarluci niicugniciu una aarcirtuun elpecen̄un; elilluku-llu una ayuqucirtuun, nunam atanirturtaini.

¹¹Kevgiurciu ATANEQ takaqluku, uuleggluci-llu

¹²cikluci ciuqerranun, eq'uqercuartuq piunrirluci-llu alqunarmek. Atawaqertut elliinun ullautellriit uqisvikluku.