Read Yupik Psalm 22 Bible Online

Psalm 22 - Yupik bible

Psalm 22

¹Agayutmaa, Agayutmaa, ciin unicia? Qayagaularyaaqua nanikualua ikayuusqellua, tau͡gaam cali ikayurtekangeksaunii.

²Agayutmaa, erenrani elpenun piicalartua, tau͡gken elpet kiuksaitarpenga; unugmi-llu cali piicalaryaaqlua tau͡gken mernuiqsaitaqlua.

³Tau͡gken atanirturilriaruluten Tanqilria, taunguluten Israel-aam nanraumakii.

⁴Ciuliamta ukveqellruatgen; cacetuqutekngatgen-llu elpet anirturluki.

⁵Qayagaullruatgen qimagluku-llu aarnarqellria; tusngavikellruatgen qacuvallaksaunateng-llu.

⁶Tau͡gaam wiinga ciissiuqainartua, yugtun pitanrirlua; yuut cirlaklua caunrilleklua-llu.

⁷Tangertem̄a tamarmeng picingssautek'laraatnga; alunguteteng anlluki ungaulugvikaqlua.

⁸Waten qanraqluteng, “Agayutem cacetuqutekellrung'erpeni ciin anirturyunritaten? ATANREM assikekuniten ciin ikayuryunritaten?”

⁹Agayun, elpet cavkenii yuurcetellruarpenga, mikelnguullemni-llu auluklua camun pivkaqsaunii.

¹⁰Cacetuqutekamken yuurqaanemnek ayaglua, kiivet agayutekluten elpet.

¹¹Unisngayaqunii! Picurlagnarqellria canimelan, ikayurtekartaunani-llu.

¹²Amllerrluteng inglukestem̄a nulirtetun ayuqluteng kassugutaatnga; avatairumaatnga, alingnarqellriatun nulirtetun Bashan-aamek.

¹³Aitartelartut yugtutulitun, uirrluteng allgurlua.

¹⁴Piniarutua, piniqa wangnek anluni mertun kuvkiicetun nunamun. Enrenka tamarmeng aviqisngaut; ircaquqa-llu cuicekaarkatun urugluni.

¹⁵Igyaraqa urr'artun kinraa, alungutka-llu nepluni qilagamnun. Caarrlugmun unitarpenga tamaani tuqusqellua.

¹⁶Yuut assiitellriit avatairaatnga; qimugtetun cikyutaatnga; keggmangnaqaatnga unatemkun it'gamkun-llu.

¹⁷Enrenka tamarmeng alairutut. Taumek inglukestem̄a tangvaumalaqiitnga.

¹⁸Aklunka nall'arcetaarutekluki avgait ellmeggnun.

¹⁹ATANEQ, elpet yaaqvantevkenak! Ikayurtekamken cukamek tailuten anirturnga!

²⁰Inglukestem̄a nuussirpaitgun tuqucecaqunii; anirturnga ukunek qimugten̄ek.

²¹Anirturnga ukunek yugtutulinek; akiurciigalamki ukut nulirtetun ayuqellriit.

²²Qalarutkeciqamken Israel-aarullgutemnun, agayuviatni-llu nanrarciqamken:

²³“Elpeci qigcikestaini ATANREM nanrarciu! Tamarpeci qetunraini Jacob-aam, ucurnarivkarciu! Ciktaarvikiciu, Israel-aam yuini!

²⁴Cakaayuitai arrsaulriit nallunguayuunaki-llu nangteqaqata; tunucuitai, tau͡gaam niitaqluki qayagauraqatni ikayuusqelluteng.”

²⁵Quyungqallratni nanrarciqamken; Agayulrianun elpenun tangvagtellua elliiciqua ekuagarkanek akqutkellemnek.

²⁶Arrsaulriit nerciqut piyugtacirmegcetun; ullautellriit ATANERMUN nanrarciqaat. Kitaki enuqitenrilkilit akwarpak!

²⁷Ellam yuin neq'erciqaat ATANEQ cauluku-llu; tamarmeng-llu ilakuralriit angayuqauvigni ciktaarciqut elliinun.

²⁸ATANEQ ellii Atanruuq, ataniularai atanruviit.

²⁹Tamarmeng takarnarqellriarung'e'rmeng cikciiqut elliinun; tamarmeng tuquarkaulriit yuut ciktarkaugut ciuqerranun.

³⁰Tekitarkat kinguvrita kevgiurciqaat; yuut qanrutkelarciqaat ATANEQ kinguvemeggnun.

³¹Yuut yuurteksailnguut qanrut'larciqait, “ATANREM anirtullrui yun'i.”