Read Yupik Psalm 25 Bible Online

Psalm 25 - Yupik bible

Psalm 25

¹Elpenun, ATANEQ, wiinga piicagtua.

²Agayutmaa, elpet cacetuqutekamken. Kasnguyullerkamnun pivkanrilnga; inglukestemnun ucuryagutekevkaryaqunii.

³Cirlakumayuitut cacetuqutekesteten, inglulicukaaralriit tau͡gaam elpenun cirliq'lartut.

⁴Nallunrirtessnga ayuqucirpenek, ATANEQ; elitessgu tumkiuran wangnun.

⁵Ayuqucirturnga yuullerkamnek piciulriarpegun, Agayutekngamken anirturtekluten. Cacetuqutekamken kesianek.

⁶Umyuaqiu naklegtaucin, ATANEQ, pektayiilnguq-llu kenken, elpet pikngavkek ak'a ciuqvanek ayagluten.

⁷Neq'eryaqunaki assiilnguut ayagyuallemni atullrenka. Pektayiilngurkun kenkevgun assiucirpegun-llu umyuaqia, ATANEQ.

⁸Assilriaruuq ellualriaruluni-llu ATANEQ. Taumek elliin ayuqucirtularai assiilngiumalriit tumkaitnek.

⁹Ciuliqagtelarai ellmeggnek pivakenrilnguut piciulriamun, elicet'larai-llu elliin pisqutminek.

¹⁰Piciuluni kenekluki ciuliqagtelarai tamalkuita akqutmi aturtait niisngastait-llu alerquutmi.

¹¹Akqillren aturluku, ATANEQ, au͡g'arki assiilnguunka amllerrata.

¹²Qigcikestai ATANREM elliinek eliciiqut tumkameggnek.

¹³Enuqicuunateng yuuciqut, irniarita-llu nuna piksagulluku.

¹⁴Yugnikai ATANREM qigcikesten̄i, akqutni nallunrircet'laraa ellaitnun.

¹⁵Ikayungcarturalartua ATANERMUN, elliin-llu aarnarqellriamek anirtularaanga.

¹⁶Caulua wiinga, ATANEQ, takumcukia, aliayugtua nangteqlua tuaten.

¹⁷Umyuarniurutenka au͡g'arluki, picurlautemnek aviullua.

¹⁸Tangerrluki nangtequtenka picurlautenka-llu, assiilngumnek au͡g'arisnga.

¹⁹Tangrru amllertaciat nakukestem̄a, alingnarillerteng tekilluku eq'ukillrat wangnek.

²⁰Camun pivkarpek'nii anirturnga; cirlakevkaryaqunii. Wiinga ullagamken qimagvikluten.

²¹Assiucirma iqluyuitellma-llu cavkanrillignga, cacetuqutekngamken wiinga.

²²ATANEQ, anirturki Israel-aam yui tamalkuitnek picurlautaitnek!