Read Yupik Psalm 27 Bible Online

Psalm 27 - Yupik bible

Psalm 27

¹ATANEQ tanqikaqa anirturtekluku-llu; kitumek alingengaitua. ATANREM aarnarqellriamun pivkarngaitaanga, taumek camek alingengailngua.

²Assiitellriit yuut curugaqamegten͞ga tuqutengnaqlua paallagaluteng iqualartut.

³Anguyagterugaat avataingraatnga alingengaitua; inglukestem̄a-llu anguyangraatnga cacetuquteku'urciqaqa Agayun.

⁴Ataucimek tau͡gaam kaigavikaqa ATANEQ; piyuumikekemnek kiingan: uitayuglua ATANREM eniini unguvarma taktaciatun, tangerrnaluku assirtacia ATANREM, kaigavikluku-llu ciuliqagtesqellua.

⁵Picurlagnarqellria tekiskan capkuciumaciqaanga; camun pivkarngaitaanga Agayuvigpami iluani, canun-llu enuryagutellua qertulriim teggalqum qaingani.

⁶Nutaan cirlakciqanka inglukestenka avatemni. Nunaniryuglua elliiciqua tuqutarkanek Agayuvigpiini; aturlua-llu nanrarluku ATANEQ.

⁷Niiskia, ATANEQ, qayagauqumken! Takumcuklua kiukia.

⁸Elpet waten qanellruuten, “Tailuten agayukina wangnun,” wiinga-llu kiullruamken, “Ullagciqamken, ATANEQ.”

⁹Uluryaqunii! Qenrutenrilnga; ayagcecaqunii-llu pistevni. Elpet ikayurtekngamken; ayagcecaqunii, cakaaryaqunii, Agayun anirturtem̄a.

¹⁰Angayuqaagma cakaangraagnga, ATANREM aulukciqaanga.

¹¹Elicungcarnga, ATANEQ, pisqutevnek, ciuliqagglua-llu aarnailngurkun tumyarakun, inglukestenka amllerrata.

¹²Pegcaqunii inglukestemnun, nakukngatnga iqluuruteklua akeqnerrlugqaqlua tuaten.

¹³Ukvertua wiinga unguvainanemni tangrrarkaucimnek assirtacianek ATANREM maani nunami.

¹⁴Tusngavikiu ATANEQ. Ukverluten, cacetuluten. Ilumun cacetuqutekiu ATANEQ.