Read Yupik Psalm 31 Bible Online

Psalm 31 - Yupik bible

Psalm 31

¹Elpenun, ATANEQ, qimaumaunga, cirlakevkaryaqunii. Elpet, Agayun, ellualriaruuten; anirturnga piicagtua!

²Niillua anirturnga watua! Qiurtun uqisviuluten wangnun cayailkucirlua anirturnga.

³Uqisngavikamken cayailkutekluten-llu; ciuliqagesnga akqellerpetun.

⁴Iirumalrianek napcetaanek avisngavkarnga; capkuciumalua aarnarqellrianek.

⁵Unatevnun elliaqa unguvaka. Elpet anirtullruarpenga wii, piciulriaruluten Agayutnguavet.

⁶Eq'ukaten Agayutnguat caumastait, tau͡gaam wiinga cacetuqutekamken.

⁷Angnirciqua nunaniryuglua-llu kenekngavnga kesianek. Tua-i-wa tangrravgu nangtequteka; nalluvkenaku picurlaumaciqa.

⁸Tunenrilavnga inglukestemnun; ayagayugngavkarlua umyuaqa aturluku.

⁹Takumcukia wii, ATANEQ, picurlaumiima; iigka qiavakallma assiirutak, taqsuqeqapigglua-llu.

¹⁰Angniipakallma taqsuqevkaraanga, qiavakallma-llu unguvaka nanilikanirluku. Picurlagallma piniarutellua; temka-llu cakegtaunrirluni.

¹¹Tamarmeng inglukestem̄a, arcaqerluteng nunalgutma, caunrilkenglua, nallunritestekengramteng alingyagullua; tangrraqamegten͞ga-llu qimagaaqlua.

¹²Tamarmeng nalluyagutaatnga, tuqumalriatun ayuqullua; yuum ciqitallratun ayuqlirilua.

¹³Niitanka inglukestenka agyumciaralriit; nanikuanam avaciumalua! Picirkiurluteng ilikluteng qaillun tuqutnalua.

¹⁴Tau͡gaam wiinga cacetuqutekamken, ATANEQ; Agayutkamken.

¹⁵Unguvaka elpenun tusngauq, anirturnga inglukestemnek nangtestemnek-llu.

¹⁶Pistevni wiinga naklekia; anirturlua kenken cakaniyuilnguq aturluku.

¹⁷Qayagauramken, ATANEQ; kiaresngiacecaqunii. Assiitellriit tau͡gaam kiaresngiacecimakilit; alapen'errluteng ayakilit tuqumalriit nuniitnun.

¹⁸Nepairki iqluuryulriit— tamalkuita ellmeggnek pivakellriit angenrukellriit-llu, qalarculriit caunrilkiluteng ellualrianek.

¹⁹Angnirnarquq atawaqauten takaqestevnun aninqaan! Assiucin yuut tamarmeng nallunritaat, elluarrluten-llu aulukilaucin elpenek cacetuqutengqellrianek.

²⁰Iilaraten aarnailngurmun ciuqerpenun yuut assiitellriit picirkiuraitnek; aarnailngurmun iirluki inglukestaita qanritnek.

²¹Nanraumali ATANEQ! Ukveraitnarquq kenekminek nasvagillra wangnun avatairlua curukaumallemni!

²²Alingellemni umyuartequa ciuqaminek ayagcetellruyuklua. Tau͡gaam piicallemni ikayuusqellua elliin niitaanga.

²³Kenkiciu ATANEQ, tamarpeci yuini. ATANREM cavkarngaitaa piciulria, tau͡gaam anucimirqecetaalarai pivakellriit palartevkenaki.

²⁴Pinirici caceturiluci tamarpeci neryuniurutkestaini ATANREM.