Read Yupik Psalm 34 Bible Online

Psalm 34 - Yupik bible

Psalm 34

¹Quyavikerrlainarciqaqa ATANEQ; taqsuunii-llu nanrarciqaqa.

²Nanrarciqaqa caliari pitekluki; nangcimalriit niilluteng angniqilit.

³Qalarutkiciu ATANEQ pillgucirlua; nanrarnaurput atra tamamta!

⁴Piicallruunga ATANERMUN, kiugaanga-llu; alikelallrenka alikenrirtelluki.

⁵Nangcimalriit elliinun caulartut angnirluteng-llu; qacuvallagcecimanqiggngaitut.

⁶Casciigalnguut qayagaaqatni niitelarai; anirturluki tamaitnek arenqiallugutaitnek.

⁷An'gilaan ATANREM nayularai qigcikestai, anirturaqluki aarnarqellriamek.

⁸Naspaaciu elpecen̄ek ATANREM assirtacia. Atawaqertut yuut elliinun qimaumalriit.

⁹Qigcikiciu ATANEQ tamarpeci yuini; niisngastai ATANREM camek enuqisngaitut.

¹⁰Yugtutulit piyagait neqkaituraluteng kailartut, tau͡gaam ATANERMEK piyuumiutengqellriit assilrianek enuqisngaitut.

¹¹Taici ayagyuani, niicugnilua-llu, elitnaurnaamci qigciklerkaanek ATANREM.

¹²Yuk tamarmi elluarrluni yuuyuumilartuq, unguvamayugyaaqluni-llu angnirluni.

¹³Kitaki qanerrlugaksailkina iqluuqsaunak-llu.

¹⁴Assiilnguq tunulluku, assilriamek caliluten; yuut uitanqegcillerkaat pingnatuutekluku pitacirrarpetun.

¹⁵ATANREM tangvalarai ellualriit yuut, ciutek-llu ikirngalutek qayagaurutaitnun.

¹⁶Tau͡gaam ATANREM inglulilarai assiilngurmek calilriit, tuqukuneng umyuaqenqigcimangaunateng.

¹⁷Ellualriit qayagauraqata ATANREM niitelarai; anirturaqluki tamalkuitnek arenqiallugutaitnek.

¹⁸ATANREM nayularai kanangllugtellriit; anirtularai ciunerkairutellriit.

¹⁹Ellualriim yuum nangtequtai amllelaryaaqut, tau͡gaam ATANREM anirtularaa tamakunek tamalkuitnek;

²⁰ATANREM tegumiaqaa; enra-llu atauciunge'rmi ayemcimangaunani.

²¹Assiilnguum atuqiin yuk tuquvkarciqaa; eq'ukilriit ellualrianek anucimirqecetaarumaarkaugut.

²²ATANREM anirtularai yun'i; kina atauciunge'rmi qimalria elliinun pinarquciumangaituq.