Read Yupik Psalm 35 Bible Online

Psalm 35 - Yupik bible

Psalm 35

¹Ingluliurusnga, ATANEQ, callugluki callugtenka.

²All'uku anguyagcuuten capkutan-llu tailuten anirturnga.

³Yagusgu panan caskun-llu, inglulirluki malirqerastenka! Akqia anirturciqnilua.

⁴Tuqutessaagtenka cirliqkilit kasnguyugluteng-llu! Assiilngurmek umyuangcautekestenka kingupiaqilit caciirrluteng!

⁵Carangllugtun ayuqekilit anuqem tengeskaitun, an'gilaan ATANREM malirqallrani qimagtelluki!

⁶Tumiit tan'gerili qurrayirnaqluni-llu, ATANREM-llu an'gilaan iquqluki.

⁷Camek pitaunateng pitaqengnaqaatnga, petmignun elagameggnun pivkangnaqlua.

⁸Tau͡gaam nallumeggni picurlallerkameggnun tekiciiqut; ellaita pissuuciameggnun napciiqut ellmeggnek piunrirluteng!

⁹Nutaan yuuciqa angnirciquq ATANERMI; quyalua elliinun anirtuucimnek.

¹⁰Umyuamkun tamalkirrlua qanerciqua ATANERMUN, “Elpetun ayuqellriamek pitaituq. Pivkayuitaten pinialnguut cirlakestekaitnun, arrsaulriit-llu pivkayuunaki nangtestekaitnun.”

¹¹Caruyagluteng nallunritestet inglulirlua piciliraatnga camek nallukemnek.

¹²Assilria pilqa akinaurluku assiitellriamek, umyuamnek nangteqevkarlua.

¹³Wiinga tau͡gken naulluullratni angniilutkellruluki; nangllua wangnek nereksaunii; ciklua-llu piicaglua,

¹⁴piicaucilaucimtun yugnikestemnek anelgutemnek-llu. Kanangllugtellruunga angniinii, tuquilriatun yuarnayulriatun aanaminek.

¹⁵Tau͡gken arenqiallugtellemni ellait quyaluteng quyurullua-llu anglaniteklua; nallukengama-llu nangllua, taqeksaunateng-llu kaugtuarlua.

¹⁶Yugtun picingssautekiyulriatun engangamculegnek, tangvialugalua eq'uklua.

¹⁷ATANEQ, qaillun cali pitalriamek tangvakainaqatarcit? Qimagteski caulinqestenka; anirturlua ukunek yugtutulinek!

¹⁸Nutaan wiinga quyavikciqamken takuatni yugpet; nanrarciqamken tamarmeng ciuqerratni.

¹⁹Inglukestemnun iqlungalrianun ucuryagutekevkanrilnga cirliqkuma. Ciritekevkaryaqunii camek pitkaileng'e'rmeng eq'ukestemnun angniitellma nalliini.

²⁰Qalarteksaitelartut yugnikucarakun; tau͡gaam iqluurutnek taqulluteng picilirluki ellmikun uitalriit.

²¹Picetaarutaatnga qayagpagaluteng, “Ca pillren wangkuta tangellruarput!”

²²Elpet, ATANEQ, man'a tangellruan. Taumek nepaitenrilu, yaaqsigpek'nak-llu wangnek.

²³Tupagluten makluten, ATANEQ, akiurusnga; qanercetaarumallemni ikayurlua.

²⁴Ellualriaruuten, ATANEQ, taumek pinarqutailuciqa nasvaggu; inglukestemnun ucuryagutekevkarpek'nii.

²⁵Ellmeggnun qanerkaitniartut waten, “Piyullerput piciurrluku wangkutnek ayagcetarput!”

²⁶Tamarmeng ciritekestenka nangteqlemni cirlakumalit ayuquciirulluteng; wangni-llu assinruyukellriit kasngunarqellriim kiaresngianarqellriim-llu tuskiliki.

²⁷Elluamun cingumastenka qayagpaglit angnirluteng qanenqigtaarluteng, “Ucurnarquq ATANEQ! Ilukegcitkaa pistem̄i piluaqallra.”

²⁸Nutaan wiinga elluarucin qanrutekniarqa, nanrarluten erenrem taktaciatun.