Read Yupik Psalm 37 Bible Online

Psalm 37 - Yupik bible

Psalm 37

¹Umyuarniurutkenrilki assiitellriit yuut; ciknakevkenaki-llu piciunrilnguut yuut.

²Tamaa catairuciiqut canegtun kinqaicetun; piunrirciqut naunrartun nalalriatun.

³Cacetuqutekiu ATANEQ, assilriamek-llu caliluten; uitaniartuten nunami camek alingniuqsaunak.

⁴Ilukegcitekluku ATANEQ, cikirniaraaten camek piunrukevnek.

⁵Tunluten elpenek ATANERMUN; tusngavikluku, elliin ikayurniaraaten;

⁶elluarucin ciqinqerceciiqaa akertem tanqiatun erenrem qukallrani.

⁷Nerinisngialliqevkenak utaqau ATANEQ; umyuarniurutkevkenaki tukuurtellriit wall'u yuut assiitellrianek picirkiurameggnek piciurcilriit.

⁸Umyuarrlugcarallren qenertellren-llu maligarteksaunakek; picurlagmek iqungqerragnek.

⁹ATANREM tusngavikestain nuna piksaguciiqaat, tau͡gken caarrluulriit ancimaluteng.

¹⁰Atataarqu yurrluulriit catairuciiqut; yuangerpeki-llu nalaqngaitaten;

¹¹Tau͡gaam ellmikutuulriit nuna piksaguciiqaat, nunaniryugciqluteng camek-llu enuqitevkenateng.

¹²Assiitellriim yuum picurlagcetaalarai ellualriit tangvialugaqluki eq'ukluki.

¹³Tau͡gaam ATANREM temciarautek'larai assiitellriit yuut, nallunrilamiu ak'anun pivkenateng piunriumallerkaat.

¹⁴Assiitellriit yuut nuussirpateng amuit urluvteng-llu qeluluki, tuqutnaluki arrsaulriit caitulriit-llu, tuquqnaluki-llu elluarrluteng yuulriit.

¹⁵Tau͡gaam nuussirpaita ellait kapciqait, urluvrit-llu asemqumaluteng.

¹⁶Carraunge'rmi assilriim yuum avalia akitunruuq tamalkuitni assiitellriit tukuutaitni,

¹⁷tua-i-wa ATANREM piniaruceciiqngaki yurrluulriit, tau͡gken camun pivkarngaunaki assirluteng yuulriit.

¹⁸ATANREM auluk'larai niisngasten̄i, ellaita-llu nuna pikciqaat nangyuilngurmek.

¹⁹Nangteqngaitut pillugnarqellria pingraan; enuqisngaunateng-llu kainiqnam nalliini.

²⁰Tau͡gaam assiitellriit tuquciqut; inglukestai ATANREM catairuciiqut yuilqum naunraitun; aruvagtun tayimngurrluteng.

²¹Yurrluulria navrarraarluni cimiriyuituq, tau͡gken ellualriit qunuyuunateng cikiutekameggnek.

²²ATANREM atawaqercetellrin nuna piksaguciiqaat, tau͡gaam aniqlaallri tamaaken ancimaarkaugut.

²³ATANREM tumkamten̄ek apertuutelaraakut ilukegcivkarten̄i-llu cayailkuciumaluku.

²⁴Iqunge'rmi ataam nangerciiquq, ATANREM tegumiaqngani talligken'gun.

²⁵Ayagyuallruunga, waniwa-llu ak'allaurrlua; tau͡gken tangerqaqsaunii ellualriamek yugmek ATANREM cakaaqiinek wall'u irniari kaigavkarluki neqkaitnek.

²⁶Ayuquciqluku kesianek cikiqenglallni navriskenglallni-llu, irniari-llu atawaqautnguluteng elliinun.

²⁷Assiilnguq tunulluku calikina assilriamek, kinguveten uitarrlainarniartut nunami;

²⁸ATANREM kenekngaku piciuneq cakaayuunaki-llu ellminun piciulriit. Camun pivkarngaitai akwarpak, tau͡gaam yurrluulriit kinguvrit ancimaarkaugut.

²⁹Ellualriit piksaguciiqaat nuna, uitavikarkauluku akwarpak.

³⁰Ellualriit qalartelartut ellalegtarnek, qanlaameng yuut elluakekaitnek.

³¹Inerquutai Agayutmi qemangqalarai ircaqumini, avvngaunani-llu taukunek.

³²Assiitellriit yuut nayularait assirluteng yuulriit, tuqucingnaqlerkarteng tamakunek pitekluku;

³³tau͡gaam ATANREM unisngaitai inglukestaitnun, pinarqelriaruvkarngaunaki-llu qanercetaarumakata.

³⁴Neryuniurutkiu ATANEQ pisqutai-llu aturluki; takarnarivkarluten piksaguceciiqaa nuna, tangerciqan-llu yuut assiitellriit ancimallrat.

³⁵Tangellruunga assiitellriamek yugmek nangcitalriamek; quyinruluni ilamini Lebanon-aam napaatun;

³⁶tau͡gaam kinguqvaarkun wiinga tamaaggun kitullemni tauna cataituq; yuaryaaqekeka-llu nalaqevkenaku.

³⁷Murilkiki pinarqutailnguut yuut, tangvagluku-llu ellualria. Yuk uitanqegcivkarilria kinguvengqelartuq,

³⁸tau͡gken assiitellriit tamarmeng piunriumaluteng; kinguvengqellerkaat assiitellriit kepumaciquq.

³⁹ATANREM anirtularai ellualriit picurlagnarqellriim-llu nalliini camun pivkarngaunaki.

⁴⁰ATANREM ikayularai aviulluki-llu; yurrluulrianek anirtularai, tua-i-wa ellminun ullautelaata uqisvikluku.