Read Yupik Psalm 38 Bible Online

Psalm 38 - Yupik bible

Psalm 38

¹ATANEQ, anucimirqecetaaryaqunii qenerrluten!

²Pitegcauteten kaputut wangnun; elpet unatevgun iqutarpenga.

³Qenrucavnga temka cakneq engellugturtuq; temka tamalkuan naulluutengevkarluku assiilnguma.

⁴Assiilnguma ulullua qecuqiceteqataraatnga; uqamairiut wiinga-llu arturyagulluki.

⁵Usviinii yuullruama ekinka tep'ngut avatiit-llu aruluni.

⁶Temka nengtesciigaliluni, qulugngarilua; angniitaqlua ernerpak tuquillertun.

⁷Qaika puqelvagluni, kemka-llu pikegtaunrirluni.

⁸Taqsuqeqapigtua qaillun piviirucama; umyuamkun nanikuagua engellugturlua-llu yuuniaralua.

⁹ATANEQ nallunritan mayitequteka; mangyuarilqa iirumanrituq elpenek.

¹⁰Ircaquqa nutengvagtuq, pinima unillua, iigka-llu uitenqeggialilutek.

¹¹Kenkestem̄a yugnikestem̄a-llu mallguuryuumiinii naulluuteka pitekluku; nakmiin-llu ilama qimaumalua.

¹²Tuqutengnaqestenka civciut neganek pitaqnalua, akngirtengnaqestem̄a-llu akeqnerrlugglua cairuceciiqnilua; taqsuunateng pillerkiurluteng tungemnun.

¹³Tau͡gken wii niitesciigalngurtun ayuqlua, qanyuilngurtun-llu qalartesciiganii.

¹⁴Ayuqlua kiuyuilngurtun, camek niitesciigalameng.

¹⁵Tau͡gaam wiinga, ATANEQ, neryuniurutkamken; ATANEQ Agayutka, elpet tau͡gaam niiciiqerpenga.

¹⁶Piicagtua inglukestemnun ciritekevkaryaqunii; ucuryagcecaqunaki pinerrlugtelqa pitekluku!

¹⁷Iquyukaaralriarurcama, engellugturlua kesianek.

¹⁸Apervikuatekaqa alartelqa; umyuarniurutekluku assiilnguqa.

¹⁹Inglukestenka segganqegtut pinirluteng-llu; amllertut picetaanrilnge'rma eq'ukestenka.

²⁰Akinauryugtaita assilria assiilngurmek inglukaatnga assilriamek atulauciqa pitekluku.

²¹Pegcaqunii, ATANEQ; yaaqsigyaqunak wangnek, Agayutmaa!

²²Patagmek ikayuqia wii, ATANEQ anirturtem̄a!