Read Yupik Psalm 39 Bible Online

Psalm 39 - Yupik bible

Psalm 39

¹Wii qanertua, “Ayuquciqa murilkeciqaqa assiilnginritniartua qanllemkun; camek qanllerkaqa murilkeciqaqa yuut assiitellriit canimnelkata.”

²Camek qanqaqsaunii uitallruunga, ca assingraan qanrutkeksaunaku. Tau͡gaam nangteqelqa arcariluni,

³ciunerkairullua-llu. Umyuangcalqa maliggluku uitacurlagiinarlua. Kiituani qanertua:

⁴“ATANEQ, nallunritessgu qaku tuqullerkaqa ernema-llu amllertaciit; nallunrirtessgu unguvama carraucia.”

⁵Carrarmek unguvavkararpenga. Unguvama taktacia elpeni caunrilngurtun ayuqluni. Ilumun cam tamarmi unguvii anuqvalla'artellriatun ayuqluni,

⁶cangallruvkenani-llu talinermi. Elliinginaq canek cakviurluta; quyurciaqluta tukuutnek, tau͡gken kitumun piklerkaat nalluluku.

⁷Tua-llu camek, ATANEQ, neryuniurutengqeqatarcia? Elpenek wiinga neryuniurutengqertua.

⁸Anirturnga tamalkuitnek assiilngillemnek, usviilngurnun-llu picingssautekevkarpek'nii.

⁹Nepaiciiqua, carraungraan qanerngaitua, tua-i-wa elpet waten ayuqellriakun nangteqevkaavnga.

¹⁰Anucimirqecetaarpiiqnii! Tang tuquqatalrianga nangpakaavnga.

¹¹Nunurluku yuk anucimirqecetaalaran assiilngiraqan, 'lumarrallertuyulim-llu moth-am piunririlauciatun piunrilaraten qunukek'ngaput. Ilumun yuk cangallrunrituq anuqem anuqvalla'artellratun!

¹²Niisnga piicallemni, ATANEQ, niicugniluku qiateka; taikina aluviliuquma ikayungcarlua. Tamalkuita ciuliamtun allanruqerciqngama ellma elpeni.

¹³Ilangcivkenii uitasnga angniqallerkaqa aturniarqa ayagpailegma tangrruunqiggngairullua.