Read Yupik Psalm 40 Bible Online

Psalm 40 - Yupik bible

Psalm 40

¹Utaqallruunga nerinisngialliqevkenii ATANREM ikayullerkaanek; niicugnilua-llu niitaa qayagaulqa.

²Nugtaanga alingnarqellriamek petmigmek, nugglua aarnarqellriamek qalviryamek. Tuc'etaanga cavkenii qiurmun elluarrlua tutmallerkamnun.

³Nutaramek yuarutkitaanga, aturarkamnek nanrarluku Agayutvut. Amlleret man'a tangerqunegteggu aarcirtuumaciqut cacetuquteksagulluku-llu ATANEQ.

⁴Atawaqertuq yuk ATANERMEK cacetuqutengqellria, tuigtenrilnguq agayutnguanun ilaliutenrilnguq-llu agayutulinun piciunrilngurnun agayutnun.

⁵Amllertut, ATANEQ Agayun, assilriit wangkutnun caliaten; ayuqaituten elpet! Wangkutnun pillerkiullruuten irr'inarqellrianek amllernek. Apertuqumki qalarutekluki-llu qaqitesciigacaranka amlleqapigcata!

⁶Tuqutarkanek elliitnek-llu piyunrituten; ungungssinek-llu ekuavigni ekuaganek piyugpek'nak wall'u assiilnguut au͡gautekaatnun elliitnek. Tau͡gaam ciutegemnek cikirlua elpet niicugnisqelluten.

⁷Waten-llu kiugua, “Waniwa wiinga; picirkiutem kalikaini wangnun ayuqucirtuuteten uitaut.

⁸Nunanikaqa atullra piciucirpet, Agayutmaa! Alerquuten ircaqumni qemangqaaqa.”

⁹ATANEQ, yugpet quyungqaviatni qanrutkellruaqa qaneryaraqegtaar anirturilriaruniluten wangkutnek. Nallunritan-llu, ATANEQ, wangnun nuqingaksailucia qaneryaram yugpenun.

¹⁰Anirturilaucin yugnek iirumaksaitaqa; qanrutkuralaraqa piciucin anirturilaucin-llu. Yut'en quyungqaaqata iirumaksaitaqa pektayiilnguq kenken piciulriarucin-llu.

¹¹ATANEQ, qunukenrilgu naklekuten wangnek, pektayiilngurkun kenkevgun piciucirpegun-llu cavkaryaqunii wii.

¹²Naaquciilnguut picurlagnarqellriit avatairaatnga— amllessiyaagameng naaqumasciiganateng! Assiilnguma anguatnga, tangerciigalivkarlua; amllenruluteng qamiquma nuyaini, ciunerkairutem-llu tullua.

¹³Aviusnga, ATANEQ! Patagmek ikayurnga!

¹⁴Tuqutengnaqestenka ayuquciiruskilit cirliqkilit-llu. Angnilriit pillugtelqa pitekluku utercecimakilit kiaresngiatevkaumaluteng-llu.

¹⁵Picingssautekestenka nanikuakilit cirlakumakuneng.

¹⁶Tau͡gaam elpenun ullautellriit quyakilit angnirluteng-llu. Kitaki kenkilriit anirtuutevnek qanlaqilit taqsuunateng, “ATANEQ angtataituq!”

¹⁷Wiinga waniwa arrsaugua caiturlua-llu, tau͡gaam, ATANEQ, nalluyaguteksaitarpenga. Elpet ikayuqamken anirturtekluten-llu; patagmek tailuten ikayuqia!