Read Yupik Psalm 44 Bible Online

Psalm 44 - Yupik bible

Psalm 44

¹Agayun, wangkuta ciutemteggun niitellruaput— ciuliamta wangkutnun qanrutkellruit, irranarqelriit caliaqelalten nallmeggni, ak'a tamaani:

²tungaunak ancillren atanruviit yuitnek, avitelluki yut'en nunakangevkarluki; anucimirqecetaaraqluki allat atanruvilget, yut'en tau͡gken elpet piluaqertelluki.

³Yugpet nuna piksagutellrunritaat ellaita caskumegteggun; ellmeng pinimegteggun cirlakillruvkenateng; tau͡gaam elpet pinirpegun, nalluvkanritlerpegun-llu nayuucirpenek, nasvallerpegun kenkicin ellaitnek.

⁴Elpet Ataneqamken Agayutekluten; cikilaraten cirlakillerkaatnek yut'en,

⁵pinirpegun-llu wangkuta cirlakiaqluta inglukestemten̄ek.

⁶Urluvqa cacetuqutekenritaqa nuussirpamnun-llu anirturnayukevkenii;

⁷elpet anirtullruarpekut inglukestemten̄ek, cirlakluki eq'ukesteput.

⁸Wangkuta-llu nanrarrlainarciqamteggen quyavikluten-llu akwarpak.

⁹Tau͡gaam maa-i cakaararpekut cirlakevkarluta-llu; anguyaput ayallguteksuirulluki.

¹⁰Inglumten̄ek qimagtelluta, ellaita-llu pikelput piksagulluki.

¹¹Tuqurqevkararpekut qusngitun; cekavtelluta allanun nunanun.

¹²Yut'en carraquinermun tunellruaten, akikitqapigtellriatun ayuqevkarluki.

¹³Picingssautngurcetarpekut nunalgutemten̄un, temciarautngurtelluta cakegtakumanrirtelluta-llu avaqlimten̄un.

¹⁴Temciqutaqevkararpekut yuitnun atanruviit; tungemten̄un ungaulugtaqluteng qumlikluta.

¹⁵Ernerpak kiaresngiatelartua, kasnguyuum patumaluku kegginaqa,

¹⁶niilluki nakukuyutait eqcirarautait-llu inglukestem̄a eq'ukestem̄a-llu.

¹⁷Makut wangkutnun tut'ellruut nalluyaguteksailengramteggen, akquyun-llu taqellren wangkutnun cakaaqsailengramteggu.

¹⁸Kingupiaqsaunata-llu, avteksaunata-llu tumkiurarpenek.

¹⁹Tau͡gaam elpet casciiganata unitarpekut yuilqum ungungssiinun; naligtelluta-llu tan'gercetqapigtellriamun.

²⁰Nalluyagutellrukumteggu atra Agayutemta, yaggluta-llu piicallrukumta agayutnguamun,

²¹Agayutem-qaa nallunrillruyanritaa? Elliin nallunrilkai aassaqek'ngaput umyuamten̄i.

²²Tau͡gken elpet pitekluten tuqutaugurluta, ayuqucimaluta qusngitun tuqutarkatun.

²³Tupagluten, ATANEQ! Ciin qavarcit? Tupii qavarpenek! Akwarpak pegingayaqunakut!

²⁴Ciin iirumasit wangkutnek? Ciin nalluyaguciu nangteqlerput arenqiallugcecimallerput-llu.

²⁵Nunamun iquluta palungqaukut; inangqaukut caarrlugmi cirlakumiimta.

²⁶Tailuten ikayuryarturkut! Kenken nangyuilnguq maniluku anirturkut.