Read Yupik Psalm 45 Bible Online

Psalm 45 - Yupik bible

Psalm 45

¹Niitekegcinarqellrianek qaneryaranek umyuangua, yuarutkiullemni mat'umek atanermun. Elisngalriim igartem igarcuutiitun alungutka upingauq yuarutem apallurkaanek.

²Tangssunarqenrulriaruuten angutni; qalartaqavet-llu puqigluten. Agayutem atawaqercetaaten akwarpak.

³Nuussirpiin nek'eggesgu caniqerpenun, Artuqailnguuq ATANEQ; ucurnarqelriaruuten takarnaqluten-llu.

⁴Ucurnarqucirpegun ayii cirlakillerkarpenun, anagyaaqullukek piciuneq elluaq-llu! Pinilriaruavet anagkenglarciquten!

⁵Pitegcauteten ipegtut; inglukestevvet ircaqruitnun kaputelartut; atanruviit ciuqerpeni iqulartut.

⁶Atanruvik Agayutem elpenun cikiutekellra piugarkauguq iquilngurmek. Atanirtularaten yut'en elluarrluki,

⁷elluaryaraq kenekngavgu elluanricaraq-llu eq'ukluku. Tamana pitekluku Agayutem Agayutvet cucukellruaten, kuvevikluten angnimek, quyinrurrluten allani atanerni.

⁸Aturaten narnirqelrianek tepkegcaumaut; aturcetaartet anglanivkaraqluten atanret enaitni tangnircaumalriani tulurmek.

⁹Arnauteten ilangqertut atanret paniitnek, aqumllerpet-llu tallirpilirnerani nulian nangengqaluni, aturluni tangnircautnek assinkacagarnek suulutaanek.

¹⁰Nulirrani atanrem, niicugniu qanelqa— nalluyagulluki ilaten tungayaten-llu pikina.

¹¹Kenegnartacin tangerrluku atanrem aglumakeciqaaten; Ataneqngavgu ciktelaqina ciuqerranun.

¹²Tyre-armiut payugtelarciqaatgen cikiutnek; tukuulriit-llu ungacarciqaatgen.

¹³ATANREM nulirkautii atanrem eniini uitauq, kenegnaqapiggluni. Aturiumaluni 'lumarrarmek piliaqumalriamek suulutaamek yualukamek.

¹⁴Tangnirqellriamek aturirluku ayautaat atanermun, malilirluku allanek arnanek ikayuastekainek, taukut-llu cali ikayuastekai atanermun taitait.

¹⁵Nunaniryugluteng angnirluteng-llu taingameng itertut atanrem eniinun.

¹⁶Elpet, ataneq, amllernek qetunrangciquten, ciuliarpet atanrullret enairtekaitnek, elpet-llu atanirturilriarurciiqaaten tamalkuan nunam qaingani.

¹⁷Yuarutma niitnaullren piuvkarciqaa akwarpak, yuut-llu nanralarciqaatgen akwarpak tayima.