Read Yupik Psalm 49 Bible Online

Psalm 49 - Yupik bible

Psalm 49

¹Niicugnici, tamarpeci! Niicugniciu man'a, ellarpiim yuini,

²pikegtakumalriani pikegtakumanrilngurni-llu, tukuulriani arrsaulriani-llu ayuqluci.

³Qalarciiqua umyuarturinarqellrianek; umyuangcautekellrenka-llu taringnarqeciqut.

⁴Qanruyutet umyuangcautekciqanka nalqiggluki-llu aturcetaarinanemni qelutellegkun aturcetaakun harp-akun.

⁵Alingeksaitelartua alingnarqellriit pingraata, inglukestem̄a avataingraatnga,

⁶imkut assiitellriit cacetuqutekilriit tukuutmeggnek ucuryagutekluki tuaten.

⁷Yuk ellminek anirturciigatuq; akilirciigatarput Agayun akikanranek unguvamta,

⁸tua-i-wa yuum unguvii akituqapigcan. Akiliutekarput pitalqegciigatuq

⁹akilicugngakumteggu tuqunritlerkarput wall'u akwarpak unguvallerkarput.

¹⁰Tamamta tanglartukut usvitunge'rmeng tuqulrianek; ayuqluteng usviilnguut-llu tuquarkauluteng. Tamarmeng-llu unitaqluki tukuuteteng allanun.

¹¹Qunguteng eneksagutelaamegteki taqluteng; tuani uitaarkauluteng akwarpak, nakmiin nunautengqellrung'e'rmeng.

¹²Yuk takarnarqucini pitekluku tuqumek aviusngangaituq; tamamta tuquarkaungamta ungungssiartun.

¹³Una ciunerkaqaat cangaicukellriit, tukuutmeggnek uitanqegcitengqellriit.

¹⁴Qusngitun tuqullerkameggnek ciunerkangqertut, tuqumek qusngiliurtengqerrarkauluteng. Qungumetlerkarteng ciuneqciqaat temait-llu aruluteng; tuqunret nuniit uitaviksaguciiqngamegteggu.

¹⁵Wiinga tau͡gaam Agayutem aviuciiqaanga; anirturlua tuqumun cirlakevkarpek'nii.

¹⁶Uitacurlauteksaqunaku kina tukuurtengraan, tukuutai-llu ulngiinangraata.

¹⁷Tuqukuni malikesciigatai; ucurnarqutain maligtesciiganaku qunguanun.

¹⁸Yuk unguvallermini ayuquciminek angniutengqerrsaaqsartuq nanraumaaqluni-llu piluaqallra pitekluku,

¹⁹tau͡gaam ciuliani ullagciqai tuqukuni, tanqigmek tangenqiggngaunani.

²⁰Takarnarqellemta avitessngaitaa tuqu; ungungssiartun tuquciqukut.