Read Yupik Psalm 50 Bible Online

Psalm 50 - Yupik bible

Psalm 50

¹Artuqailnguq Agayun ATANEQ qanertuq; taisqelluki nunam yui uitalriit ellam iquanek ayagluku iquanun.

²Zion-aamek natlugnerinani tangkegcinarqellriamek Agayutem tanqia ciqinqertuq.

³Agayutvut taiguq, nepaitevkenani; kenerpak-wa ekualria ciunrani, avaciaruterluni-llu ellarayalriamek.

⁴Elliin-llu qayagaurak qilak nuna-llu nallunritesten͞gusqellukek yum'inek cuqcillermini.

⁵Qanerluni, “Yuut taivkarciki wangnun, imkut ekuagiluteng akquyutmek taqutellret pillgucirlua.”

⁶Qiliit nasvagaat Agayutem ellualriarucia, ellii tungaunani cuqcisten͞guan!

⁷“Yumaa, niicugniqercia qanrutnaamci; Nallunairiciqua inglulirluci, Israel-aam yuini. Wiinga Agayutnguunga, elpeci Agayutkarpecia.

⁸Nununritamci ekuagilaucirci pitekluku, ekuagarkanek-llu taiquralallerci wangnun pitekluku.

⁹Wiinga aturyunritanka angucalut kuluvauteci wall'u qusngirngalnguuteci;

¹⁰ungungssit tamalkuita yuilqumelnguut wiinga pikngamki, kuluviit-llu cali qemirugarni tiissitsaani uitalriit.

¹¹Yaqulget-llu cali tamalkuita wiinga pikanka, unguvalriit-llu tamalkuita yuilqumi pikluki.

¹²“Kaigyaaqeng'e'rma qanrucanritamci; ellarpak iluanelnguut-llu tamalkuita wiinga pikngamki.

¹³Nerlartua-qaa kemgitnek angucalut ungungssit? Mel'artua-llu-qaa qusngirngalnguut augitnek?

¹⁴Quyallerci tau͡gaam tuqutarkatun elliitekiciu Agayutmun, Artuqailngurmun-llu Agayutmun akqutkelci tamalkuita cikiutekluki.

¹⁵Picurlagaqavci qayagaularcia, anirturniamci, elpeci-llu nutaan ucurnarivkarniarpecia.”

¹⁶Tau͡gaam Agayun assiitellrianun qanertuq, “Ciin apaagilarceci alerquutemnek? Ciin-llu qalarutkelarceciu akquyuteka?

¹⁷Tau͡gken ellangcautenka elpeci eq'ukluki, alerquutenka-llu caunrillekluki.

¹⁸Yugniksularaci teglengalriit; akusrarutekitulit-llu ilagaryugaqluki.

¹⁹“Assiitellrianek qanqeryukaaralartuci; qanqataunaci iqluuryugluci.

²⁰Nakmiin ilakutan piciliryukaarluku, canganarqutkainek-llu yuarturluten.

²¹Qanqaqsaitellruunga tuaten pilangerpeci, kiituani umyuarteq'languci elpecicetun ayuqsuklua. Tau͡gaam waniwa ellangcaryaaqamci man'a taringnariluku ciuqerpecen̄un elliluku.

²²“Niiciu una, ukuut wangnek nallunguarivakalriani, piunriryuamci yugmek-llu anirturtekaiciiquci.

²³Quyavikaqavcia elliilartuci qigciklua wiinga, wiinga-llu pinritevkenaki anirturciqanka tamalkuita niisngastenka.”