Read Yupik Psalm 51 Bible Online

Psalm 51 - Yupik bible

Psalm 51

¹Takumcukia wiinga, Agayun, kenken pektayiilnguq aturluku. Takumcutaqapigcavet perriisqanka assiilnguunka.

²Carrirru tamalkuan assiilnguulqa wangnek-llu erurluki pitsaqutmek assiilnguunka.

³Wiinga-wa alarqaqellrenka nallunrilkenka, assiilnguqa-llu umyuamni uitauraraqluni.

⁴Elpet kiivet tungevnun assiilngirtua, assiilnguuluku tangvak'ngarpenek aturlua. Taumek pinarqut'liumalqa elpeggun canganarqutailnguq; camek-llu canganarqutailan cuqcillren wangnek.

⁵Ilumun assiilngurkun yuugua yuurqaanemnek; qingaurqaanemnek assiilnguungama.

⁶Elpet yuk qamaggun piciusqumaan; taumek elitnaurnga umyuartuyaramek qamaggun ircaqumkun.

⁷Assiilnguqa wangnek au͡g'arru iqairutniartua; erurlua-llu qanikcarmi qatenrurrniartua.

⁸Imirnga angnimek quyatmek-llu; yuuciqa caunrillrung'e'rpegu navegluku, ataam angniq aturniarqa.

⁹Assiilnguunka ulurki, perrirluku tamalkuan assiilutka.

¹⁰ATANEQ, menuilngurmek umyuirnga, nutaramek-llu piciulriamek-llu ayuqucilirlua.

¹¹Ciuqerpenek ayagcecaqunii; anerneren-llu tanqilria teguyaqunaku wangnek.

¹²Ataam taisgu anirtuumalriani elpeggun angniq, niisngalriarurtellua-llu elpenun.

¹³Nutaan ayuqucirtuanianka assiilngiumalriit alerquutevnek, umyualinqiggluteng uterrniartut elpenun.

¹⁴Tuquvkaryaqunii, Agayun, anirturnga tau͡gaam, angniutekluku qalarutekniarqa ellualriarucin.

¹⁵Ikayurlua qalartessnga, ATANEQ, wiinga nanrarniamken.

¹⁶Tuqutarkat ungungssit elliitnguluki piyuumiitaten, elliiyaaqekuma-llu ekuagilua ilukegciteksanritan.

¹⁷Ircaqumikun iluteqluni umyuarniuryaraq elliitnguuq ciuniuyunarqellria Agayutmun; Agayun, qessakngaitan ellminek pivakevkenani umyualinqigtellria.

¹⁸Agayun, takumcukiu Zion-aaq ikayurluku-llu; naparesgu ataam capkutaq avaperutii Jerusalem-aam.

¹⁹Nutaan ilukegcitekniaten elluarrluteng elliitekumalriit tuqulluki-llu ekuavkarluki elliiteput; ungungssit-llu angucalut elliitekciqait tuqulluki ekuavigpet qaingani.