Read Yupik Psalm 55 Bible Online

Psalm 55 - Yupik bible

Psalm 55

¹Niisnga piicallemni, Agayun; tuigcaqunak wangnek piicallemni!

²Niicugninga ikayurlua-llu; arenqiallugutma caviirucetaatnga.

³Alingqapigtua akeqnerrlugutaitnek inglukestem̄a, qamua nangcatnga assiitqapigtellriit yuut. Picurlagavkalaraatnga; qenerrluteng-llu ilacuklua.

⁴Cakneq nanikuagua, tuqunayuklua-llu alinglua.

⁵Alingama cakneq qiivem tutaanga, nanikuallma-llu casciigatevkarlua.

⁶Qanerlua-llu, “Waniwa-tuq yaqungqerrlii yaqulegtun, tengyalrianga ayaglua mernuinercillerkamnun.

⁷Yaaqvanun tengyartua yuilqumi-llu uitalua.

⁸Cukangnaqlua uqisvigkamnek yuaryartua, qimagluku tuknilria anuqa ellarayak-llu.”

⁹Picirkiurait piunrirki, ATANEQ, taringutesciigatevkarluki. Tangertua nangyutellrianek inglukulluteng nunarpiim iluani,

¹⁰ernerpak unugpak-llu avatairaat, picirkartuyarrluteng picurlagcetaariluteng-llu.

¹¹Canek navguriluteng tamiini; uumikiluteng ilameggnek, tuneniarvigni-llu kipussaalriit teglegiluki.

¹²Inglukestem̄a picingssautekekanga ilulngung'e'rma aturciqaqa; ingluliurlua-llu ucuryaguskanga, unilluku iiryartua elliinek.

¹³Tau͡gaam tuatnasteka elpenguuq aipaquratukeka, calillgutka yugnikek'ngaqa-llu.

¹⁴Nauwa qanengssautelallrulriakuk agayullgutkaqlunuk-llu Agayutem eniini.

¹⁵Inglukestenka tuqukilit pinarivailegmeng; ayakilit unguvarmeng tuqumalriit nuniitnun! Assiilngurmek qemangqaangqertut ircaqumeggni enemeggni-llu.

¹⁶Wiinga tau͡gaam qayagauraqa ATANEQ Agayun ikayuusqellua, elliin-llu anirturciqaanga.

¹⁷Unuakumi, erenrem qukallrani, unugmi-llu arenqiallugutenka nepliutek'laranka elliinun, elliin-llu niiciiqaanga.

¹⁸Cavkenii ut'ruciiqaanga tamaaken callugvillemnek, inglukesterugamnek anguyagvillemnek.

¹⁹Agayutem akwarpak atanirturilriim niillua cirlakciqai; picirkiutet atunrilatki qigcikevkenaku-llu Agayun.

²⁰Aipaquralallma yugnikek'ngani yaggvikai inglukluki; akqutkellni navegluku.

²¹Qalartellra unganaqsaaquq, tau͡gken eq'ukutmek umyuarluni; qalartellri niicuuminaqsaaqluteng, tau͡gaam nuussitun ipellriatun kilirturiluteng.

²²Arenqialluguteten tuniki ATANERMUN, elliin cayailkucirciqaaten; elluarrluteng yuulriit cirliqevkayuitai.

²³Tau͡gaam elpet, Agayun, egciiqaten tuqutarayulit iqlungalriit-llu qunguitnun unguvallerkaata avga pellugpailgan. Wiinga tau͡gaam cacetuqutekciqamken.