Read Yupik Psalm 58 Bible Online

Psalm 58 - Yupik bible

Psalm 58

¹Elpeci atanirturilriani, picirkangutnek-qaa taqutelartuci ellualrianek? Cuqcilartuci-qaa yugnek elluarrluci?

²Qang'a! Umyuangcalartuci tau͡gaam assiilngurnek atu'urkarpecen̄ek, akngirkengengnaqluci yugnek maani nunami.

³Assiilngurmek calilriit ayuquciqelaraat tuatnallerteng yuullmeng taktaciatun; iqluuryugluteng yuurqaanermeggnek.

⁴Tuqunarqellriamek imangqertut ciissirpagtun snake-atun; ciuteteng umgumaluki niicuilngurtun ciissirpagtun cobra-tun,

⁵niisngaunaku erinii ciissirpagnek caqtaarcecistem, wall'u yuarucirluni angalkumirtaalriim.

⁶Agayun, navgurki keggutait alingnarqelriit yugtutulit.

⁷Catairuskilit mertun qurrlulriatun; canegglugtun-llu tutmausngaluteng nalakilit.

⁸Nepcurlitun merlerurtellriatun ayuqekilit; mikelngurtun-llu tuqumaluni yuurcami tanqigmek tangeqsailngurtun.

⁹Camek nalluinanermeggni kepliarumalartut canegglugtun; uluryanaqluni eq'uqerrluni Agayutem tengceciiqai nalamanrilengraata.

¹⁰Ellualriit quyaciqut tangerqunegteki assiilngiumalriit anucimirqecetaarumaluki; augatni-llu ivrararkauluteng.

¹¹Yuut qanlarciqut, “Ellualriit yuut nunuliumaut; ilumun Agayucetangqelliniuq nunam yuin cuqtestiitnek.”