Read Yupik Psalm 59 Bible Online

Psalm 59 - Yupik bible

Psalm 59

¹Aviusnga inglukestemnek, Agayutmaa; tuqutengnaqestemnun pivkaryaqunii!

²Aviullua assiilnguum caliaqestainek; anirturnga tuqutarayulinek.

³Atam nayulriit tuqutnalua; alingnarqelriit quyurrluteng inglulirnalua. Assiilnguq atulqa pitekluku pinritaatnga, ATANEQ.

⁴Pinarqutaileng'e'rma-llu cukangnaqluteng ayalartut nayurvigkameggnun.

⁵ATANEQ Agayun Artuqailnguq, Israel-aat Agayutkaatgen. Tupagluten anucimirqecetaarki atanruvilget; ilakuivkenaki assiilngurmek picirkiulriit.

⁶Atakuaqan ataam tailartut, uirraniluteng qimugtetun tarralluteng nunarpagni.

⁷Niicugniki arivtellratni akeqnerrlugciluteng-llu. Alungutait nuussirpagtun ayuqluteng, tau͡gken umyuarteqluteng kitumun niiteksaicukluteng.

⁸Tau͡gaam elpet, ATANEQ, engelarautekaten; qacungakaten tamalkuita agayumanrilnguut.

⁹Pinin nalirrukenritaqa, Agayun, wiinga qimagvikamken.

¹⁰Agayutma kenekngamia ullagciqaanga; elliin tangerceciiqai inglukestenka cirlakumavkarluki.

¹¹Tuqucaqunaki tau͡gaam, yum'a nalluyagucuaraat qaillun pillrat. Pinilriaruuten cekavvluki piunrirki, ATANEQ, cayailkuciumastemta.

¹²Qanraqameng assiilngilartut, assiitellriarrlainarnek qalarcuameng; napeskilit ellaita ucuryagutmeggnun. Aniqlaayulriaruata iqlungarluteng-llu,

¹³eq'uqerrluten piunrirki; piunrirki caunriqapiggluki. Nutaan yuut nallunrirniaraat Agayutem atanirturicia Israel-aam yuinek, nunam-llu yuinek tamalkuitnek.

¹⁴Inglukestenka tailartut atakuaqan, uirraniluteng qimugtetun tarralluteng nunarpagni,

¹⁵tuar qimugtet neqkaiturluteng tarritellriit, uirraniaqluteng camirtesciigataqameng.

¹⁶Wiinga tau͡gaam aturciqua pinin yuarutekluku; unuakut tamalkuita aturpalarciqua kenkevnek. Cayailkutekngamken wiinga, qimagvikaqluten nanikuagaqama.

¹⁷Nanrautnek aturciqua elpenun. Elpet, Agayun, uqisvikamken, Agayun kenkutminek cakaniyuilngurmek nasvagilria wangnun.