Read Yupik Psalm 66 Bible Online

Psalm 66 - Yupik bible

Psalm 66

¹Angnirluci nanrautnek neplirci Agayutmun, tamarpeci ellam yuini!

²Atuutekiciu atran ucurnarqucia; nanrarluku ucurnariluku!

³Qanruciu Agayun, “Anglilli irr'inaqvaa caliarpeni! Elpet pinin ayuqailan inglukesteten alingluteng ciktelartut ciuqerpenun.

⁴Nunam yui tamarmeng agayuut elpenun, nanrautnek aturtut elpenun, aturluteng-llu nanraraat atren.”

⁵Tailuci tangerciki Agayutem caliari, irr'inarqellriit taqellri yuut takuatni.

⁶Imarpik nunaurtellrua kinertelluku; ciuliaput-llu piyualuteng qerarluteng. Tuani angnillruukut caliara tangerrluku.

⁷Artuqailucini aturluku atanirturilartuq; atanruviit murilkelarai. Taumek elliinek cakaarilriit ellmeggnek pivakenrilkilit.

⁸Nanrarciu Agayutvut, tamarpeci nunarpallgutkelriani; nunam yuinun niitelluci nanrarciu.

⁹Elliin unguvavkaraakut iquvkaqsaunata-llu.

¹⁰Elpet-wa, Agayun, naspaallrukevkut; qerrirlim menuircaumalallratun kenerkun, tuacetun menuircallrukevkut wangkuta.

¹¹Kuvyamun naptellriatun pivkallruarpekut atmagtelluta-llu uqamailngurnek.

¹²Inglukestemten̄un tutmaucetellruarpekut; kenerkun merkun-llu ayallruukut, tau͡gaam maa-i ciunicelluta alingnailngurmun uitallerkamten̄un.

¹³Elliitekamnek taiciiqua enevnun; elliilua wiinga akqutkellemnek.

¹⁴Picurlaumallma nalliini akqutkellemnek cikirciqamken.

¹⁵Elliiciqua qusnginek ekuavigmi ekuagarkanek. Tuqucirraarlua ekuagiciqua angucalunek qusnginek qusngirngalngurnek-llu, aruviit mayurtelluku pagaavet qilagmun.

¹⁶Tailuci niicugniyarturci tamarpeci qigcikestaini Agayutem, qanrutniamci elliin caliallrinek wangnun.

¹⁷Wiinga-llu qayagaullruaqa ikayuusqellua; nanrarluku-llu yuarutetgun.

¹⁸Assiilnguunka nallunguallrukumki, ATANREM niicallrunritaanga.

¹⁹Tau͡gaam ilumun Agayutem niitellruanga; elliin piicauteka niitellrua.

²⁰Nanraumali Agayun, piicauteka cakaanrilaku kenkii-llu wangnun cakaniyuunani.