Read Yupik Psalm 68 Bible Online

Psalm 68 - Yupik bible

Psalm 68

¹Agayun nangerrli, inglukestai-llu cekavvlit; eq'ukestai qimaglit cirliqluteng!

²Aruvagtun tengeskiitun, tuaten ayagcetai; cuicekaarkatun urulriatun kenrem mallgeskiini, tuaten-llu piunriqilit assiitellriit yuut Agayutem ciuqerrani!

³Tau͡gaam ellualriit angniqilit Agayutem ciuqerrani; ucuryagglit nunaniryugluteng!

⁴Atuuciu Agayun, nanrautekiciu atra; atuuciu ayalria tusngaluni amirlunun. Atqaa ATANEQ—angnirci ciuqerrani!

⁵Agayun uitalria tanqilriami Agayuvigpamini, qaunqilartuq elli'irnek aulukluki-llu aipainret.

⁶Nanitamayaalriit uitavigkit'larai; itengqalriit-llu angnillerkaatnun anevkaraqluki, tau͡gaam ingluliculriit nunakarniilngurmi nunami uitaarkaugut.

⁷Agayun, yut'en ciuliqaggluki ayallerpeni, yuilqukun ayautellerpeni,

⁸nuna pektellruuq ellarvagluni-llu, tua-i-wa taingan Agayutii Sinai-am,[12] Israel-aam yuin Agayutiit.

⁹Ellarvagavkallruan amllermek, nunauten ataam nunaksunarivkarluku;

¹⁰yut'en-llu nunalillruut tamaavet; elpet-llu assiucirpegun pikangevkallruaten arrsaulriit.

¹¹ATANEQ alerquillruuq, amlleqapigtellriit-llu qaneryartullruut:

¹²“Nunam atanri anguyagtetuumarmeng qimagtut!” Arnat-llu kingunermeggni uitalriit avellruit uayaaqengallrit:

¹³yaquleguat qerrirlimek qalliliumalriit, suulutaaqegtaarmek-llu qevlercetellriamek yaqruit qalliliumaluteng. (Ciin elpeci ilaitni qusngit uitaviita akunlaitni uitallruceci anguyallrata nalliini?)

¹⁴Artuqailnguum Agayutem cekavcetlerminiki atanret Ingrimi Zalmon-aami, qanircetellrua tuani.

¹⁵Elpet ingrikayak, Bashan-aam ingria; cingikellrialirluten ingriuluten!

¹⁶Cingikellriarpenek ciin tangvagciu ciknakluku ingriq[13] Agayutem cucukellra uitaviknaluku? Tuani ATANEQ uitaarkauguq nangyuilngurmek!

¹⁷Tiissitsaanek amllernek anguyagcuuterluni akalrialegnek ATANEQ taiguq Sinai-amek tanqilriamun uitavigmun.

¹⁸Mayullruuq qertulriamun ingrimun, teguaminek amllernek maligluni; akurturluni amllernek cikiutnek inglukestem̄inek. ATANEQ Agayun uitaciquq tuani.

¹⁹Atawaqerli, ATANEQ piniliumastevvut unuaquaqan; Agayun anirturtekarput wangkuta.

²⁰Agayun Agayutvut anirturilriaruuq; ATANEQ Atanerput, elliin anirtularaakut tuqumek.

²¹Agayutem pinritevkenani navgurciqai inglukestem̄i qamiqurrit, ciumurucilriit assiilngurmek atuqmeggnek.

²²ATANEQ qanellruuq, “Wiinga ut'ruciiqanka inglukesteci Bashan-aamek; ut'ruciiqanka imarpiim et'uqrinek,

²³augatni ivrarniartuci, qimugteci-llu augmek piyugtacimegcetun alungniartut.”

²⁴Agayun, yugugarnek maligluten ayallren tamarmeng tangrraat, maligluni ayallra Agayutma Atanema Agayuviminun.

²⁵Aturtet ciuqliuluteng, aturcetaalrianek kinguqlirluteng, akunleqlirluteng nasaurlurnek kallagcetaalrianek.

²⁶“Nanrarciu Agayun yui quyungqallratni; nanrarciu ATANEQ, Jacob-aam kinguvrini!”

²⁷Ciumek agiirtuq Benjamin-aaq yuullgutkellriani ikgellrulria, kinguqlii-wa Judah-m ciuliqagtai ilateng-llu, kingunratni-wa ciuliqagtai Zebulun-aam Naphtali-m-llu.

²⁸Pinin nasvaggu, Agayun, pinin atullren wangkuta picilluta

²⁹Agayuvigpagpenek Jerusalem-aami, atanret cikiutnek iluvauciviatni elpenun.

³⁰Nunurru Egypt-aaq, yuilqum kelugkarrluum ungungssia; nunurki atanruviit, angucalut piyagalget yugnek, nunurluki ciktellerkaatnun elliillerkaatnun-llu qerrirlinek elpenun. Cekaveski yuut anguyagyunqellriit!

³¹Arenqiirturtet taiciqut Egypt-aamek; Sudan-aarmiut talliteng nalugluki piicagciqut Agayutmun.

³²Aturci Agayutmun, tamarpeci angayuqauviin nunam yuini; aturci nanrarluku ATANEQ,

³³eglertellria qilagkun, ak'allauqapigtellriakun qilagkun. Atam erinani ayagteskii neptuqapigtellria.

³⁴Qanrutkiciu pinia Agayutem; ucurnarqucian naliumaa Israel-aaq, artuqailucia-llu qiliit nasvaumaat.

³⁵Irranarquq Agayun taillermini Agayuviminek— Israel-aam yuin Agayutiit! Pinirilarai asvaililuki elliin yun'i. Nanraumali Agayun!