Read Yupik Psalm 69 Bible Online

Psalm 69 - Yupik bible

Psalm 69

¹Anirturnga, Agayun! Mermi uyaqukaarlua kisngaunga.

²Angayaarrlugmun marayamun kitua, tell'itesciiganii; kisngaunga et'ulriami, qairet-llu qecuqiceteqatarlua.

³Qayagaulnguunga ikayuusqellua, igyaraqa-llu akngirnariluni. Iigka meciirutuk kiarpakaama elpenek ikayurtekamnek.

⁴Nuyamni amllenruut eq'ukestenka cacetaanrilnge'rma. Pinirtut tuqucugtenka, callugtenka iqluuruteklua. Teglegaqenrilkemnek tuaten angicivkarlua.

⁵Agayun, wiinga assiilnguunka nallunritaten; alarrlua pillrenka iirumanritut elpenek.

⁶Elpenek cacetuqutekilriit wangnun kiaresngialutkaitnek pivkaryaqunaki, ATANEQ Agayun Artuqailnguq! Kasngunarqutkaatnek taicivkaryaqunii elpeni agayumalrianun, elpet, Agayutiitni Israel-aat!

⁷Tua-i-wa elpet pitekluten caunrilkumiima kasnguyugcecimalua-llu.

⁸Israel-aam yuini allanertun ayuqliriunga, nakmiin-llu anelgutemni tangnerranarqellriatun ayuqlirilua.

⁹Ilunglua enevnek kenkillma nangtaanga, caunrilkuuraqatgen wangnun tut'elaata.

¹⁰Wangnek caunrilkessagullua yaagaqama, yuut caunrilkelaraatnga.

¹¹Angniitelqa tuquilriatun nasvagluku missuullernek at'aqama, temciarautek'laraatnga.

¹²Tumyarani qanengssautek'laraatnga, taangiqellriit-llu yuaruciaqluteng apalluqlua.

¹³Tau͡gaam wiinga piicagtua elpenun, ATANEQ; kiuniarpenga, Agayun, elpet piyungellerpeni. Kiuniarpenga angqapigtellria kenken aturluku, akqutkellren-llu anirturciqnilua pinricen̄arngailavgu.

¹⁴Qap'icecaqunii angayaamun; inglukestemnek anirturnga, et'ulriamun mermun pivkarpek'nii.

¹⁵Ulerpagmun naligcecaqunii; qecuqicecaqunii et'uqami qungumun-llu igelriatun pivkaryaqunii.

¹⁶Assilriakun kenkevgun kiukia, ATANEQ; angelriakun naklegtaucirpegun wangnun tuigten.

¹⁷Iiryaqunak pistevnek; nanikuagua cakneq, patagmek kiunga.

¹⁸Malkanirlua anirturnga, aviullua inglukestemnek.

¹⁹Nallunritan caunrilkuurumaciqa, kasnguyugcecimalqa, takaqumanrilqa-llu; inglukestenka-llu tamalkuita nallunritaten.

²⁰Caunrilkuurutaita umyuaqa navguraat, taumek ciunerkairutellrianga. Takumcukestekamnek yuange'rma nataqutenritua; qarutestekamnek-llu cali nataqutevkenii.

²¹Kaillemni tuqunarqellriamek neqkamnek cikillruatnga, meqsullemni-llu cungarninarqellriamek merr'illua.

²²Nerevkariyaraita negatun pitaqekilitki; qigcignarqellrianek-llu elliitnek neryaraita napteskilitki piunrillerkaatnun.

²³Tan'geqitevkarki tangerciigatevkarluki, qukaircukaarangevkarluki-llu!

²⁴Qenruskiki cakneq; kenertun qenertellerpegun angukiki.

²⁵Arulaingqayarait uitavigkarniiruskilit; pelatekait-llu yuirulluteng.

²⁶Tua-i-wa nangcatgu ak'a anucimirqecetaallren; elpet kilirtullren nangteqevsiarcetaat.

²⁷Qalliqelrianek pinarqutengqerceskiki; anirtuutevnun-llu ilauvkaryaqunaki.

²⁸Atrit-llu perriumakilit unguvam kalikainek; ilausnganrilkilit-llu ellualriit igausngaviatnun.

²⁹Tau͡gaam wiinga umyuamkun nangtequa engellugturlua-llu; nalugnga, Agayun, anirturlua-llu!

³⁰Wiinga nanrarciqaqa Agayun aturlua; quyalua elliinun nallunairciqaqa angtacia.

³¹Mat'um ATANEQ ilukegcivkanruciqaa kuluvagni elliitngullerni, taqmigingalriami-llu angucalumi ungungssimi elliitekumalriami ekualuku.

³²Man'a nangcimalriit tangerqilitgu quyaluteng-llu; elpeci agayulalriani Agayutmun tengrucaraumakici.

³³ATANREM niicugniuralarai enuqitellriit, nalluyagucuunaki-llu yun'i itengqalriit.

³⁴Nanrarlin'gu Agayun qiliim nunam-llu, imarpiim-llu cali mermiutartuumarmi.

³⁵Agayutem anirturciqngaku Zion-aaq ataam-llu naparrluki nunarpai Judah-m. Elliin-llu yui tuanciiqut piksagulluku;

³⁶kinguvarciquq-llu yuin kinguvritnun, kenkestai-llu tuani uitaarkauluteng.