Read Yupik Psalm 7 Bible Online

Psalm 7 - Yupik bible

Psalm 7

¹ATANEQ Agayutmaa, elpenun qimagtua; anirturnga aviullua-llu malirqerastemnek.

²Yugtutulitun qamurlua ayaucuaraatnga, tuani-llu ikayurtekaunii, allguryuaraatnga caunrirlua.

³ATANEQ Agayutmaa, iliit iqlutun pillrukumku, yugnikeka-llu picurlallerkaanun tunellrukumku, camek-llu pitkailengraan inglukesteka uayallrukumku— tua-i waten pillrukuma—

⁵kitaki anguvkaqia inglukestemnun, iqullua tuqutniaraatnga, unilluku-llu temka cailkamun.

⁶Eq'uqerrluten nangerten, ATANEQ! Inglulirki inglukestenka. Tailuten ikayurnga wiinga, elluarrluni cuqcillerkaq piyuutekngavgu.

⁷Quyureski yuut avatevnun, nutaan-llu ataniumaluki atanruvigpet pakmani aqumllitaanek.

⁸Elpet cuqtelaraten yuut tamalkuita. Cuqcikuvet wiinga iryaklua cuqcikina, nallunrilavgu camek pinarqutailuciqa.

⁹Elpet ellualriaruluten Agayutnguavet cuqingaan umyuarput piyuumiutvut-llu. Arulaircessgu assiitellriit yuut caliarat, nunulirluki-llu assirluteng yuulriit.

¹⁰Wiinga Agayun cayailkutkaqa; anirtularai yuut piciulriit ircaqumegteggun.

¹¹Agayun elluarrluni cuqcisten͞guuq, pinarqut'lilarai-llu yuut assiitellriamek atulriit pinriteksaunaki.

¹²Yuut umyualinqigtenrilkata Agayutem nuussirpani ipegcarciqaa, urluvni-llu qeluluku upingariluku;

¹³teguluki tuqunarqelriit caskuni urluvni nuvaa ekualrianek pitegcautnek.

¹⁴Tangerrluku, assiilnguq yuk taqutelartuq umyuamikun assiilngurmek calinaluni; picirkiulartuq picurlagcetaarinaluni iqluquluni tuaten.

¹⁵Elalartuq petmililuni yugnek pitengnaqluni, tau͡gaam ellii tuavet igtelartuq.

¹⁶Assiilngurmun caliaminun ellii naptelartuq, elliinun tull'uni ilaminun akngirutekengnaqellra.

¹⁷Wiinga ATANEQ quyavikaqa ellualriaruan cuqcilallra. Aturciqua-llu nanrarluku atra ATANREM quyinrulriim.